buannel

Tun thla February 23 a District 6 a VC leh Aizawl khawpui chhunga Local Council inthlanna thlithlai tu tura ruat Election Observer 44 te chu vawiin chhun khan State Election Commission chuan I&PR Conference Hall ah ko khawmin inthlan leh a kaihhnawih thila an mawhphurhna hrang hrang hrilhfiahna hun a nei a ni. Jan 8 a inkhawmah hian State Election Commissioner Pu C.Ropianga chuan sorkar laipuia Administrative Reforms pahnihna in a rel angin State Election Commission chu tualchhung inrelbawlna dinna tura inthlan buaipui tura mawhphurhna a pek dan te tarlangin inthlanna fel leh fai, thianghlim leh zalen leh zahawm tak buatsaih a nih chuan mipui aiawha thlanchhuah te pawh dik leh fel, mi zahawm an ni anga. Chu chu ram leh hnamin a rah an tel dawn a ni, a ti.

Local Council atana Observer 10 leh Village Council atana Observer 34 ruat te chu an mawhphurhna chipchiar taka hrilhin dik tak leh rinawm taka an hna an thawh phawt chuan khawi atang mahin hlauh tur an nei lovang, a ti a. Chhan an tulna apiangah SEC chuan a tawp thlengin an thla vang a hauh dawn a ni, a ti. Pu C Ropianga chuan heng Observer ruatte hi tun atanga inbuatsaih lawk tur leh February 13 atang phei chuan inthlan lam chungchang chauh hna a nei tawh turin a chah a. Mizoram sorkar tawiawmna nen inthlanna fel fai tak neih pui thei ngei turin a sawm a ni.

Inkhawmah hian SEC Secretary Pu P.Lianhrima pawhin inthlan leh a kaihhnawih chungchanga hriattur hrang hrang tlangpui a hrilhfiah a. Model Code of Conduct kenkawh a nih dan te leh a bikin MGNREGS leh NLUP kal lai mekah erawh chuan ngaihhnathiamna engemaw chen pek a nih thu leh inthlan hma kar khat la awm tihah erawh chuan heng hnuaia tanpuina chi reng reng sem phal a nih tawh loh thu a tarlang a ni.

Jan 8 hian Election Observer tura ruat te chuan thil hriat chian ngai lai nia an hriat zawhna thahnem tak an zawt hlawm a, SEC lam hotu ten an hrilhfiah a ni.

America ram State pakhat North Carolina-a Shelby khuaa cheng Nu pakhat Lindsay Wood an tih chu Feb. 1 khan Pathian thu zirna atangin a lo hawng a. A fapa kum sawm panga mi chu an in kawta bawlhhlawh paihna bur chu han dah fel turin a tir a. Chutih lai tak chuan mi pakhatin Pi Wood-i chu a rawn bei a, a hrawk awmna lai vel a nghawng chu a zai thler sak a. An thenawm nu sawi danin, Pi Wood-i chuan mi sual hnenah chuan amah chu tina lo tur leh Pathian a hmangaih a, a fapa pawh a hmangaih thu a hrilh a. Police sawi dan chuan, a fapa chuan a nuin chu mi sual pa chu anmahni tina lo tura a ngen lai thawm chu a hria a, in hnung lamah chuan a lo biru a ni.

Pi Wood-i chuan a car leh a pawisa pawh mi sual hnenah chuan a sawi hmuh a. Mahse, chu mi sual chuan engmah a duh chuang lo. Pi Wood-i chuan hliam a tuar chung pawhin a Bible a keu va, amah beitu mi sual chu a chhiar sak a. Mi sual chuan a ngai thla a. Pi Wood-i chuan inkhawm turin a sawm bawk a. Darkar khat leh a chanve lai hnuah chuan misual chuan ngaihdam a dil a, a kal san ta a ni. Pi Wood-i nghawng hliam chu damdawi inah hmun sawmhnih leh panga vel laiah an thui sak a, an kilh beh sak bawk a. Chutianga mi pawisawi lo tihnat duh ringawt misual chu police te pawhin an la man theih ngei an beisei a ni.

He thu hi Feb. 5 a chanchin thar an tar chhuaha lo lang a ni a. Mi sualte sualzia leh mi thate thatzia hi a inpersan nasa hle tih a tichiang a. Matthaia bung liah khan Setana chuan Isua kha thil chi hrang hrang, ei leh bar tur te, mahni inhumhimna tur te, ropuina leh hausakna tein a thlem a. Chung thlemna do harsa tak takte chu Pathian thu hmang vekin Isua khan a ngam a nih kha. Chutiang bawkin Pi Wood-i pawhin Pathian thu hmangin amah beitu mi sual chu a hnawt bo thei a. Tunlai hun harsa tak kan tawn mekah hian Pathian thu hi kan ral thuam tha bera kan hman theih a va duhawm em! Nge, ei leh bar, silh leh fen tha tha, cell phone tha tha te, hausakna leh nawmchenna tinrengtein kan Pathian hi kan hralh zel dawn em ni ang le. Pathian tana thuhretu rinawm kan ni thei ang em?

Women’s Ministry

Zozam Times : Feb. 3 khan Chapchar Kut 2012 hmanna tur hmun tur chungchangah Chapchar Kut Organising Committee P.C. Zoram Sangliana, Art & Culture Minister chuan a office chamber-ah Energency Meeting a ko a. Art & Culture hotute Jt. Secretary, Director leh Officer te bakah MJA President leh Central YMA hotute an tel a ni. Chairman chuan inkohkhawm a nih chhan sawiin, Mizoram Football Association (MFA) Honorary Secretary hnen atanga lehkha dawn ‘Chapchar Kut 2012’ A.R. Lammuala hmang lo tura Chapchar Kut Organising Committee a ngenna chu sawiho a tul vang a nih thu a sawi a. Hemi chungchang hi member te chuan an sawihova, “Mizoram Football Association (MFA) ten A.R. Lammual a phul lem phah an roh a, humhalh an duhna hi a zahawm kan ti a. Amaherawhchu, kan Mizo hnam Kut pui ber Chapchar Kut hi hmundangah min dawl zo tur remchang a awm mai loh avangin meeting hmasa lama kan lo rel tawh angin Chapchar Kut 2012 hi A.R. Lammual-ah ngei hman tha kan ti” an ti.

Hemi bakah hian, Chapchar Kut 2012 hi District tinah uar tak leh hlim taka an lo hman theih nan Rs. 1 lakh theuh pek tha committee chuan a ti a. Hemi denchhen hian Deputy Comissioner (DC) kaihhruainain a Committee din nise, YMA-te leh pawl remchang dangte nen lo inbuatsaih se an ti.

Chapchar Kut 2012 Organising Committee hi 14th Februaty, 2012 Chhun dar 12:00-ah P.C. Zoram Sangliana Art & Culture Minister Office Chamber-ah neih leh turin thu an dah a. Hetah hian Secretary, Industries Deptt. chu a bika sawm nise an ti.

Committee chuan Chapchar Kut 2012 pual hian A.R. Lammual luhna Gate leh Vankhama Building bul atanga Treasury Square inkar chu Mizo taka cheimawi tha a ti a. Lengpui Airport atanga lo kalte hmuh turin Chapchar Kut 2012 lawmna thuziak mawi leh langsar taka tarlan nise. Hei hi a tul angin Organising Secretary leh Central YMA hnuaia Cultural Sub-Committee ten mawh lo phur se an ti.

Hei bakah hian Chapchar Kut-a thla latute an felfai zawk nan a tul anga ruahmanna lo duang turin Mizoram Journalist Association chu ziaka ngen nise an ti bawk.

Chapchar Kut 2012-ah hian kum upa te pualin Hranghlui Mizo inchei a lang turin hun siam sak tum a ni a, heng mite hi ngaihhruaihna thil hlan nise, hemi hun atan hian Naupang Mizo Incheia incheite inlan hunah tih ve mai nise an ti bawk.

Shel Silverstein hi naupang thawnthu ziak thin a ni a, cartoon ziah te leh lemchan thawnthu ziah te pawh a timi viau a, thu leh hla lamah pawh a hming hian sawi a hlawh hle a ni. Thu leh hla tha tak tak “A Boy Named Sue”, “Queen of the Silver Dollar”, “The Cover of the Rolling Stone” te leh hla dang tha pui pui pawh phuah mahse Shel Silverstein hian hming a chherna tak tak zawk chu naupang cartoon leh naupang thawnthu ziah lam a ni.

Kum tam tak liam ta ah khan Shel Silverstein hian nula hmeltha tak Sylvia Pandolfi chu a ngaizawng a, hun engemaw chen an inngaihzawn hnu chuan Sylvia Pandolfi chuan pasal dang a nei dawn tih thuthang leng vel chu Shel Silverstein hian alo hre thawi deuh a, an pahnih chu inti thiam lovin an inthen phah ta a ni.

Tumkhat chu Shel Silverstein lungleng chuan phone atangin Sylvia Pandolfi chu thil awmdan zawng zawng leh thil chinchang hre turin phone booth atang chuan biak a han tum a. Sylvia Pandolfi te ina telephone chu a biak tum loh zawk Sylvia Pandolfi nu Pi Avery chuan alo pickup nulh pek a, Shel Sliverstein chuan Pi Avery hnenah chuan Sylvia-i a biak lawk thei em tiin a han zawh nak chuan a chhanna che Shel Silverstein tan chuan a lawmawm loh khawp mai.

Pi Avery chuan “Sylvia-i chu a buai lutuk a, phone pawh a chhang hman lo” tiin alo hrilh a, “Sylvia-i hian nunthara nun a tum mek lai leh a hlim ve lai tak hian rawn tibuai lovin, kalsan rih mai rawh” a tih hman chauh tihah Phone booth nghaktupa chuan an inbiakna chu tihtawp sak pahin cents 40 a han dil a, minute 3 hnuah a dang a dilbelh leh tur thu an hrilh nghal bawk a.   Hmanhmawh em emin Shel Silverstein chuan Sylvia te in chu a han phone tha leh a, Pi Avery hnenah chuan Sylvia-i chu a biak duh thu leh tha tak leh dam taka thlahna tawngkam hlan a duhthu a han hrilh pawhin Pi Avery chuan “Sylvia-i chu vawiina zin turin a thuamhnaw a remfel mek a, Sylvia chuan Galveston khaw mi pasalah a nei dawn a, a rilru chawk tho thar lovin amah chu engmah sawi pui lo mai rawh” a ti a. minute 3 a lo ral hman, cents 40 a chawibelh a ngai leh ta.

Phone chu Pi Avery vek chuan lo la in, Sylvia chu dar 9-a rail chhuak tur chu a manhman a ngaih avangin a hmanhmawh tawh tih pahin Silvia chu ruah sur thut hlaah nihliap keng tel turin a han hrilh nghal zat a. Pi Avery chuan Shel Silverstein hnenah chuan an rawn phone avangin lawmthu a han hrilh a, tawngkam tha takin lo phone fo turin a han ngen nghal a. Mahse, minute 3 a lo ral hman, cents 40 a chawibelh a ngai leh ta.

Pi Avery khawngaih takin Sylvia hnenah khan ‘Mangtha’ min lo tih sak dawn nia tiin a phone biak chu a titawp ta a ni

via FB Chanchinthar : Feb.Ni 2, 2012 khan Delhi Mizo Zirlai Pawl (DMZP) Lehkhabu buatsaih ’8th SCHEDULE-A MIZO TAWNG DAHLUH ZIRCHIANNA BU’ chu Mizoram Journalist Association President Pu H.Zosangliana’n Aizawl Press Club-ah a tlangzarh. He tlangzarh inkhawm hi Pu Lalthangfala Sailo, President Mizo Academy of Letters chuan a kaihruai a. NGO hrang hrang leh Political Party aiawhte pawh an tel a ni. Lehkhabu tlangzarhtu, MJA President Pu H.Zosangliana chuan 8th Schedule-a Mizo tawng dah tha a tih thu leh lungrual taka Mizo mipuite tanrual a hun takzet thu a sawi a. 8th Schedule-a Mizo tawng dah duhlotu MZP-te pawh hian tanchhan mumal an neilo a ni a ti.

Lehkhabu bihchianna hun Prof.Laltluangliana Khiangte chuan Mizo History-a thil pawi ber mai chu Peace Accord-a Mizo tawng 8th schedule-a dah an telh ve lo kha a ni a, Bodo ho chuan an Accord-ah 8th schedule-a telh an nih theih nan telh nachang an hria a, kan underground-te aiin Bodo underground te chu an fing hret a ni a ti. Pawl hrang hrang aiawhin thu an sawi bawk a ni. He Lehkhabu hi a thlawna sem tur a ni a. Mizoram Chief Minister Pu Lal Thanhawla’n a chhut man  tum sak a ni. DMZP chuan Mizo tawng 8th Schedule-a tel ve ngei theih nan Mizo mipui zawng zawngte lungrual taka tangho turin an sawm  a ni.

Zozam Times : Oil & Natural Gas Commission (ONGC) chuan Meidum bul leihnuai metres 3000 chuanga thukah gas a awm ngei tih an finfiah tawh a. Hei vang hian lei verh hna hi chawlhsan tawhin, a verhna hmanrua pawh an senghawi tan leh tawh. Helai hmunah hian Director General of Hydrocarbons-in gas a awm thu official-a a puan hun nghah mek a ni a. Official-a puan a nih chuan Mizoram chu Hydrocarbons Map-ah a chuang ve tawh dawn a ni. ONGC ten gas an laihchhuahna hmun hi Thawhlehni khan chanchinbu miten an tlawh a. Director General of Hydrocarbons-in Mizorama gas a awm thu puang thei turin gas awm zat tur te, oil awm thei dan tur te chhutchhuah (modeling) a la ngai a, chuvang chuan a tak taka laihchhuah theih hun tur a la sawi theih loh niin an sawi.

ONGC hian oil/gas zawn tak tak hna hi nikum February ni 1, 2011 khan an tan tih sawiin, metres 3859-a thuk an verh a. Gas/oil zawnga hna an thawhnaah phalna an mamawh, clearrance te chu tihfel vek a nih thu leh Mizoram sorkar leh lei verhna bulhnaia awm mipuite tawiawmna avanga an lawm thu an sawi bawk.

ONGC hnathawktute chuan zawhna chhangin, helai hmun atanga gas/oil (hydrocarbons) an laichhuahte chu central lama an hmunpuiah uluk taka zirchian mek a nih thu leh, hemi azir hian gas/oil tam leh tam loh te, hmalak zel dan tur a hril chauh dawn tih an sawi a. Mizoram sorkar nen MoU ziaka fel taka inremna a awm thu te, gas an laihchhuah tawhah a tha pawl a ni ngeia an ngaih thu te, gas/oil chu lei hnuaia dil ang maia tling ni lovin, lung chikhat (sandstone) kara awm a nih thu te leh engtiang taka tam nge a awm tih pawh an la sawi theih loh thu an sawi a ni.

Thudawn danin, gas result ber official-a puan a la nih hunah a siak chhuah tak tak hna chu tan theih a nih chauh dawn a, hei pawh hi bul tan hun tur hriat lawk a la ni lo bawk. Hetih lai hian, helai hmuna gas/oil te hi hralhsuma chantir a nih hunah a hlawkna hi a tirah chuan a awmna state (Mizoram) in 12.5% chang tura hisap a ni a, 13th Finance Commission recommend ang chuan a zahve ve ve (50:50)-a insem tura tih a ni a. Thla 15-18 velah a siakchhuah tak tak hna hi thawk tan hman tura ngaih an ni.

Meidum-a gas an hmuhchhuah zingah 96% chu mathane a ni a, gas zingah a tha ber a nih thu an sawi.

ONGC ten Meidum-a gas (sample) an laihchhuahna hmasa ber hi Hortoki-I HOAB tih a ni a, hemi atanga km 20 vela hla Bairabiah hmalak lehna tur hmun atan HOAA tia vuah chu ruahman fel a ni tawh bawk a. Meidum-a gas laichhuah result azir hian an bawh -zui leh mai dawn nia hriat a ni.

Meiduma lei an verh, an chhinna chu ‘Christmass Tree’ tia koh a ni a, hetiang hmanga an chhin chuan an hlawhtling tihna a niih thu ONGC hotute chuan an sawi.

via FB Zoram Khawvel : India rama zirna tha leh a awmna hmun khua leh veng te pawhin an chhuanvawr em em thin NIT chu Mizoram Aizawlah bun a ni ve ta a, India ram thalai lehkha thiam thei fal te an rawn fuankhawma, mahse Mizoram Aizawlah zawng an beiseina sang tak chu a hniam zawngin a tla ta riai riai a, zirlai ten nawrhna hial an kalpui ta mai a, hei zet hi chuan Mizoram sorkar hmel a tibal zual a ni.   NIT Mizorama din a nih thu khawvel huapin tlangzarh a ni a, Internet lamah pawh tarlan chuai chuai a ni a, zirna hmanrua te chu tunlai thei ang ber ber a lantir a nih vangin India ram State hrang hrang atangin zirna lama tuihal thalai an rawn fuan khawm tan dek dek a, tunah chuan zahna tur hlir mai in a hmuak a, an sawi ang leh a nih dan tur angin engmah alo ni lo tih a takin an han hmu a, ei leh in lamah lehzel puarkhawp pawhin anlo hrai lo leh nghal a niawma, ava zahthlak zo zai em!

NIT kher kher hi chu Politics a inchirhtheh chi pawh a ni lo; Zirlaite chhan tur hian khawngnge ram pum hual zirlai NSUI te kha an awm tak? Mizoramah Branch neiin Congress Bhavan ah hmun an inkhuar a ni lawm ni? Mizo Zirlai Pawl (MZP) te, Mizo Students Union (MSU) te kha an awm zawh tak! Ram pum huap zirlai ten Mizo te Jerusalem Aizawlah ngei harsatna an tawk a ni lawm ni!. Chhantu an ngai, puitu an ngai, tun hi Zirlai pawl te chetchhuah hun a ni dawn lawm ni!   NIT Mizoram hmel a balh hian Mizo hnam hmel a ti thim tih te pawh hi Pu Hawla hruai Congress Ministry hian an hre phak lo em ni? Ava zahthlak em!. Mizoram kan mualpho lutuk a ni lawm ni!.

Chief Minister Pu Lal Thanhawla kaihhruaina in Jan 30 khan Council of Ministers chuan Chief Secretary Conference Room, New Secretariat Building, Khatla ah thukhawmin thu pawimawh tak tak an rel. Cabinet Meeting-ah hian ziaka thurel tur (agenda) 5 an chhawpchhuah a, Report of Pay Committee, 2011 chu Village Council leh Local Council inthlan puan tawh anih avangin la ngaihtuah that atan dah rih a ni a. Travelling Allowances Rules for Judicial Service Officers on Implementation of the Mizoram Revision Pay Rules chu pawm a ni a. School Academic Session thlak chungchang rawtna pawh pawm a niin, School Calendar thar atan April – March pawm a ni bawk a, hei hi Academic Session 2013 atanga hman tan tura remtih a ni.

Proposal for Amendment of the Mizoram State Employment Guarantee Fund Rules, 2009 pawh pawm a ni bawk a. Mizoram Civil Services (Combined Competitive Examination) Regulations, 2011 pawh pawm a ni bawk a, hei hi Official Gazette ah chhuah anih atanga hman tan nghal tura remtih a ni bawk. Heng agenda ziaka chhawpchhuah te bakah hian Mizoram State Finance Commission a hnathawktu tur post 27 siam thar Cabinet Meeting hian a remti bawk a ni.

February 23-a Village Council leh Local Council inthlan neih turah State Election Commission chuan Presiding Officer, Candidate, Election agent, Polling agent leh voter te tan polling station chhung ah mobile hman a khap a; hei hian mobile ri chhuak lova daha hman pawh a huam a ni. Counting agent te leh ziaka phalna neite tan pawh counting hall chhungah mobile lakluh phal a ni lo va. Returning officer, Observer, Counting offiicial leh Security personnel te erawh chu mobile ri chhuak lova daha an kawl phal sak an ni. State Election Commission chuan Polling Station leh Counting Hall chhunga meizuk a khap tlat bawk a ni.

Jan 27 chawhma dar 9:40 vel khan Lalduhawma kum 25 S/o L Lalmuana Thenzawl UPC veng chu Kanghmun leh Buangpui inkarah a bike khalh leh tipper insuah ka chhawn lohin a thi. Lalduhawma hian nupui neiin fa pakhat a nei a, Thenzawl UPC venga a pa te in bulah miin luahin inhrang an chang ve a ni. Amah hi 2 wheeler mechanic zir chhuak a ni a, bike han siam ve chang chu nei thin mahse, thingzai kharchhawngin ei a zawng thin.

Thudawn danin Lalduhawma hian Jan 27 zing khan Ramlaituiah mi bike hlui, siamthat hnua hralh leh atan a lei a, Thenzawl phurh thlen tumin mi motor a lo phar a, Lungleia bungraw dah hawng, Aizawl lam pan Pu C Lalpanliana khalh 207 (D3 Business Enterprise Ramhlun North-a Mechanic) chu Ramlaitui khaw chhungah a lo phar dinga, a ni hian Lalduhawma bike lei chu a phurh sak ta a ni. Thenzawl lam pana an tlan chu Lalduhawma hian CBZ in a zuia, Buangpui thlen hmain a tlan pel a, a tlan pelh hnu rei vak loah Kanghmun leh Buangpui inkar Pu Lalvuana Dil bul kawngkual laiah Tipper nena an insu chu Pu C Lalpanliana hian a va hmu ta mai a ni.

LPK Tipper Midum (Dumka) khalh nena an insut hnu hian Tipper khalhtu hian thiamchan tumin a motor hi a side tha a, a side thatna lamah Lalduhawma hi a hrut zui deuh em ni tih chu an sulhnu atangin a rin theih niin thu dawnna chuan a sawi bawk.   Pu C Lalpanliana’n an insutna hmun a thlen chuan Lalduhawma hi biak theih a ni lova, Thenzawl damdawiin panpui thuai tha an tih avangin LPK Tipper driver dumka pa nen chuan Duhawma bike lei 207 in a phurh chu unload in Lalduhawma chu Motor-a hlanluh an tum a, hetia an buaipui lai hian midang an rawn thlen belh ve tawh a, chutianga an buaipui lai chuan Duhawma hi a hliam tuarlovin a chatthla zui ta a ni. Lalduhawma a chahthlak hnu hian a sut pui LPK Tipper Driver Dumka hi a bibo ta niin thu dawn na chuan a sawi.   Duhawma hian helmet a khum lova, phiar lukhumlum a khum a, a hmai pawh a khem nual. Thi chhuak a tam lem lo na a, a luah hliam natak a nei nia a rinthu thudawnna chuan a sawi bawk.

North East Games chu a tum 2-na atan January ni 24 khan sawn hlat a nih thu hriat a ni a, Chawhnu lam khan thil chiang zawk hriat tumin Organizing Committee Official te biak pawh tum a ni a, Network lam chian loh vangin biak pawh theih an ni lo a. Tlai lam khan Mizoram State Sports Council Joint Secretary Pu Lalrosanga chu biak pawh theih hram a ni a. Sawn hlat anih chhan tlangpui hetiang hian a sawi. Remchan zawkna avanga February ni 27 atang March ni 1 chhunga Mizoram in a dilna chu Delhi lam inthlan Vote chhiar hun lai a ni dawna, he hun ah hian SAI hotute tam zawk an inhnam hnawih a tul avangin, Delhi lam SAI hruaitute’n hun dang ruat tura an hriattirna chu MSSC Sr.Sports Promotion Officer Pu.C.Laltlanthanga’n a dawng a, tichuan meeting hi neih chilh nghal a ni.

Mizoram chuan Chapchar kut bakah zirlai exam hun te leh March thla chhung a, Assembly Budget Session bakah thil pawimawh dang engemawzat a awm dawn a vangin a hun tur ruahman hi thil har tak a ni a. April thla tawp lam ah hian Delhi lama SAI Programme leh State hrang hrang Sports Programme te thlir chungin hun remchang ber ni a, ngaiin a hun hi kan sawn ta mai a ni a. A Ni (Date) tak pawh final theih ala ni lo a, Proposal ang deuh chauh ala ni tiin a sawi.

Pu RS-a chuan Zoram tan phei chuan hmunhma leh inbuatsaihna kawng hrang hrang atan a pawimawh zawk dawn a, hei hi tunlai Infrastructure kan siam mekte tih puitlin a nih hman vek phei chuan State hmel timawi tu leh Infiamna lamah pawh dinhmun thazawk dinna chance kan neih phah thei dawn a a hriat thu a sawi bawk.

NE.Games Mizoram in a thlen tur chungchang hi zoram mipui te bakah Infiamna lam ngaihven tu Zofa tlang hrang hranga awmte’n in ngaih ven hle tih kan hria a. Hetianga a hun sawn hlat a nih hian Zoram tan hmasawnna leh hmingthatna tam tak a pek belh thei dawn niin a ngaih theih a. A lawmawm lehling zawk hle a ni. A hun leh ni te la hriat theih loh mahse, Infiammite leh a buaipuitute chuan inthlahdah hauhlovin Zoram tan inpuahchah zual sauh sauh turin kan in ngen nghal a ni e..

Mizo pa ropui James Dokhuma kha vawi khat chu inneihnaah a kal a, fuihna thu sawi turin an ti a. A ding a, heti hian a sawi ta a..

Aw le, kei hi vawiina inneite fuihtu tur ber ka ni em tih phei chu ka inhre hauh lo. Amaherawhchu, a zawhte upata upa ve ta na na na chu, tawn leh pal hriatte a ngah e min tite pawh a ni fahmiang. Mahni mawhphurha tla na na na chu theihtâwpin kan han hlenchhuak talh talh tur lah ni.

Mizote’n ‘innei’ kan tih hi a han fuh bikzia mai chuh! Vai tawnga sadi an tih hian a hril pha em tih phei chu ka hre hauh lo. Ka tawng thiam tâwk loh vâng lah ni maw? Sap tawnga married an tih hian a a hril pha em tih lah ka hre bik lo. A.. A hril pha a nih pawhin ka hre lo kei chu. Mizopa tawngina ‘innei’ kan tih chu lai leh laia intâwk ‘fifty fifty’ kha ‘hundred’ a channa a ni. Sawmnga note leh sawmnga note kha zain kan thleng tlang ta tihna a ni chauh.

Mizo hi kan mak khawp a, kan nupui tur chu kan fate rual lek pawh ni se, kel sam bak to tawh pawhin nupuiah nei sela, Mizo nunah chuan mipa hi duat ngai zâwka inhre tlat hnam kan ni a, hmeichhiate hi in fin hle a ngai. Chumi in tihdân tur chu ka’n sawi ang e: bilât artui pakhat theuh theuh pawh hi in han chawi bûk lãk lãk ang a, ‘Hei hi a rit tha zâwkin ka hria, Matei pa’n ei rawh se,’ in han tih ringawtte hian kan thawh ngai loh hna hram pui puite hi kan cho uai uai zel a nih hi!

Vai dawra lukham bûk inang reng, a rih lam inang reng in lei a, leihka tlâng sângah in pho va, in han hem lum a, zân mut dâwnah nuin mutna a’n siam a, a’n bêng thawk thawk a, ‘Hei hi a lum nuam zâwk, Bawihtei pain kham rawh se,’ a’n tih tawngkam tha ringawtah te hian kan la fan ngai loh leh kan la tlawh ngai loh ram hi kan mang kal zut zut mai a ni.

Mizote’n kan thil chìna tha lo ka tih deuh pakhat chu, kan innei ta chèng a, kan inrîm laia, ‘Muante, Muante,’ inti thin kha, intihpâ nan inneih tûk atangin ‘Lalmuanpui’ kan han inti ful ful hi chi tihchi a ni hauh lo. ‘Muante’ kan tih pawh kha ‘Muante’ ti phal tawh lovin, ‘Bawihte,’ han ti ila, chhûngril lamah hian hmuh theih lohvin lâwmna chibai kan inbûk tawr tawr zel ngai nia mawle.

Kha’ng ka sawi zawng zawng kha in lo ngaithla a, vawiina in innei hi inhmangaihna thu in sawi tam tawh em vânga innei in ni lo va, dam chhûnga hmangaih thu sawi zawm zel turin in innei tan chauh a ni zâwk. In nutei fate emaw, in kawmchhak naute emaw, in patea fate vânga in sawi loh bung rem rum kha sawi zawm char char turin in innei tihna a ni zâwk e. Kha’ng ka sawi anga in ti a nih ngat zawngin nuin an thingrem rawn chhawm luhte a rawn khawh hmaa chhîpchhuan chhuah lûk lûk chu a ngai hauh lovang. In thosilen te in tlawh teh hmaa thiah rup rup lah a ngai hauh lovang tih hi ka tiam ngam khawp mai che u.

Source Mizo Fiamthu-ah hian a tawngtaina dangdai tak pawh chhiar tur a awm e.

Zalen : 2011 September ni 30-a Sairang Kurung lui chhuaha mihring bawp chhar, Mizoram Police hnuaia Forensic mithiam ten Tripura Forensic Laboratory-a enfiah turin an thawn result nghah me a ni a. Hetih lai hian, nikum vek September ni 15 zan thim hlima Zuangtui Venga an In luah atanga chin hriat loha bo Siampuii pawh Police ten an la zawng reng. Thudawn danin, Sairang Kurung luia bawpruh chhar atanga DNA test tur hi Aizawl-a Forensic Laboratory-ah test theih a nih loh avangin Tripura-ah thawn a ni a. DNA test result hi nghah mek niin, tun January thla chhung ngei zo turin Forensic lam hotute chuan an nawr mek. Test result hi Police te pawhin Aizawl North College-ah BA 2nd Year zir mek Siampuii bo chungchanga result an nghah mek zingah a tel nia hriat a ni.

Lalsiampuii (Siampuii) (19) d/o B Lalmalsawma, Sakawrdai Chhim Veng nula bo chungchangah hian Police te pawhin hma an la zui reng tih thu dawn a ni a. Nikum December thla tawp lam pawh khan Sairang Kurung lui chu Aizawl North SDPO hovin tum 4 zet zawn/dap nawn leh a ni a. Thu tharlam tak awm rih lo mahse, a theih ang anga zawn zui reng a ni, thudawnna chuan a ti. Siampuii bo chungchangah hian state pawn lamah a thlalakte nen information thawnchhuah a nih bakah a tul anga lo tanpui tura ngenna pawh thlen a ni tawh a ni.

Zozam Times : Aizawl Local Council electoral roll peihfel takah vote nei 1,74,868 awmin draft roll atangin mi 6,219 in a pung a, mipa vote nei thei 83,080 an awm laiin hmeichhe vote nei thei 91, 788 an awm a, mipa aia hmeichhe vote nei thei tamna hi 8,708 a ni. Draft roll-ah khan vote nei mipa 80,390 an awm a, final roll-ah 83,080 awmin, mi 2,690 in a pung a. Draft roll ah hmeichhia 88,259 awmin final roll ah 91,788 awmin, mi 3,529 in an pung a, a vaia punna hi 6,219 a ni. Draft roll atanga vote nei thei awm belh zat hi 12,646 a ni a, vote nei 6,427 te chu paih a ni thung.

Electoral roll tharah hian Aizawl local council zingah Zemabawk chu vote nei tamna ber niin mi 5,100 an awm a, Chite chu an tlemna ber niin vote nei thei 343 an awm thung. Local council siam thar pali Chaltlang North, Khatla East. Model veng leh Tuikhuahtlang local council siam thar a ni a, an awmna hlui (parent local council) atanga la chhuakin siam fel nghal a ni. Chaltlang North local council-ah vote nei 1,630, Khatla East-ah vote nei 1,145, Model vengah 844, Tuikhuahtlang-ah vote nei 1,130 a awm a ni.

Local council roll tarchhuah hun tura tih chu nimin kha a ni a, roll hi zawh fel a ni a, local council chungchanga chinfel ngai ala awm avangin vawiin hian tarchhuah a ni anga, a duh apiang en theihin DC office, MERO leh AMERO office bakah vengchhung enumerator leh local council te hnenah dah a ni dawn  a ni.

Aizawl local council draft roll chu December 12, 2011 khan mipui en theiha tarchhuah a ni a, hemi ni atang hian December 14, 2011 thleng khan paih ngaite paih dilna leh kum tling thar leh Roll a la chuang lo hrim hrimte tan hming thunluh dilna hun hawn a ni a. December ni 2 – 14, 2012 chhunga dilna luttte chu December ni 15-30, 2012 chhung khan MERO/AMERO kaihhhruaina hnuaiah veng tina local council, NGO, enumerator ten an enfiah a, enfiah hnuah MERO/AMERO ten an thehluh hming thunluh ngai leh paih ngai bakah siam that ngaite chu election branch in an enfel leh a ni. Tichuan a vawi khatna atan Aizawl local council electoral roll chu peihfel alo ni ta.

Village council leh Aizawl local council inthlan hun tur hi State Election Comission chuan Jan 19 chhun dar 12 hian Aizawl Press Club-ah press mite hmaah a puang dawn a ni.

click image to enlarge

via FB Zoram Khawvel : Dt.18.1.2012 (Nilaini) tlai dar 3:00 chiah2 a ni a. Dar 4:00 thleng Office hour anih laiin Mizoram sorkar hmunpui ber, New Capital Complex Secretariat-a Office hrang hrangte chu a ruak hiai huai tawh a. Dawr tur an awm tawh meuh lo. Hei hi Vigilance Department Office a ni a, a sira Political & Cabinet Office pawh a ruak vek bawk. Kan sorkar hmunpui-ah hian Discipline a awm lo ni berin a lang

Zozam Times : Chief Minister Lal Thanhawla chuan hlemhletna (corruption) chu a zung nen phawi mek niin, phoro hmabak a la nih thu a sawi. Thawhtannia Lengpui Community Hall-a Mamit East Block Congress Conference cum Political Traning buatsaih a hmanpuina-ah Lal Thanhawla chuan, “He ramin natna hlauhawm ber a vei chu ‘corruption’ a ni a, hei hian min chiah hneh hle tawh a. Chumi chhiatna atang kan ram hi kan chhanchhuah a ngai a, chumi ti tur chuan dikna, felna leh tha a ngai. Fel lo, dik lo leh tha lo kan hai-chhuah a ngai a, kan haichhuak mek a ni. Tunah hian corruption hi a zung chawpin kan phawi mek a, phoro erawh chu kan la hmabak a ni,” a ti.

Tun sorkara ramhruaitute chu Pathian kaihhruaina zarah eirukna lakah pawh an la fihlim hle a ni tih sawiin lawmawm a tih chu MPCC party president ni bawk Lal Thanhawla chuan a sawi a, eptu lam pawhin eiruk thuah sorkar dinglai beihna tur zawng reng mahse beihna an la hmu lo  tih sawiin, “MNF party president chuan ‘Kum 3 hnuah Congress ho hian thil tih dik loh an neih chuan kan dim miah lovang,’ tiin a sawi ve chauh a ni,” a ti.

“Kum 10 an sorkar hnuah po-licy kan hrualmum dawn an ti chauh a, a ngaihna hre lovin kha leh chen min kaihruai lo se la Mizoram hian kawlphetha-ah intodelhna nei tawh tur kan ni,” Lal Thanhawla chuan a ti bawk.

NLUP chungchang sawi kaiin, “Prime Minister nen kan sawi dun a, tha an ti hle a, state dang pawhin NLUP formula hi an dil a, mahse an pe rih lo a ni. Keini khan kum 5 atan chhungkaw 1,20,000 tan cheng vaibelchhe 1500 kan dil a. Mahse sorkar laipui mithiam zawk ten ennawnin infrastructure components leh a vilna tur lirthei leina turte rawn siambelhin kan dil aia tam cheng vaibelchhe 2000 min rawn pe ta zawk a ni,” tiin Lal Thanhawla chuan a sawi.

Mamit East Block Conference-ah hian bial chhung party hruaitu khaw hrang hrang atangin mi 200 vel an tel a, bialtu MLA John Rotluangliana chu khuallian niin tlaiah khawmpui chhimtute hian ruai an theh nghal a ni.

Jan 16 dar 8:30 vel khan Serchhip khaw chhung Darnam tuikhur bulah PWD Labour Babulal kum 40 vel mi chu Road Roller in a luah a chil a, ka chhawn lohin a thi.  Thudawn danin Babulal leh a thawhpui te hian nimin khan Mat phai Zawlpui panna kawng blacktop hna an thawk a, an hnathawk bang Serchhip pan-a an hawn hian khua a thim tawh a, light an neih loh avangin Babulal hian torchlight nen hma a hruai a, a ruih deuh avangin a torchlight ken te thlauhin a petek kual nasa thei hle a, an chetsual hma hian a torchlight kenlai pakhat thlauh palhin road roller hian a chil chhia a, midang ta hawh lehin chumi hmang chuan hma a hruai leh ta a ni.

A rui phur hi Road Roller sir leh hmalamah te a phar kualin a lam vel thin a, Serchhip khawchhung Darnam tuikhur bul NH54 an thlen lai hian Road Roller Operator Rajesh Hemron chuan a thianpa chu road roller hmalamah a awm turah a ngai mai a, mahse Babulal hi Road roller sir lam atanga petek sual palhin a ke hnung lamah a in barh lut palh a nih an ring. Road roller hian Babulal lu hi a chil sawp hneh hle a, a lei te pawh a bung niin mita hmutu chuan a sawi. Chetsualna bula awm mi pakhat chuan Road roller operator chu au in ding turin a ti a, kawngpuia Babulal let reng an han enchian chuan thil awmdan an hre ta chauh a ni.   Babulal hi kum tamtak Mizorama awm tawh a ni a, PWD labour niin achang chuan PWD hotu te in lamah te a thawk thin. A ruang hi PWD lam hotuten an hlawm a, vawiin lamah Serchhip damdawiinah post mortem a ni ang. He thu buatsaih lai hian a chhung te leh an khua hrechiang an awm loh avangin Serchhip-a phum tur nge an khaw lama thawn dan ngaihtuah tur tih an la chiang thei lo.   Road roller operator Rajesh Hemron hi kum 26 a ni a, amah hi Jarkhand lam mi a ni.

Jan 16 khan Aizawl Municipal Council Board of Councillors Emergent Meeting chuan Local Council thar dilna pali (4) a ngaihtuah a. Mission Veng Local Council atanga Model veng leh Tuikhuahtlang te, Chaltlang local council atanga Chaltlang ‘N’ Local Council thar tur te indan a remti a. An ramri tur pawh Bialtu Councillor te leh Local Council dinglai te nen remtih tlanna laa siamrem nghal a ni. Khatla leh Khatla ‘S’ Local Council atanga indan dil Khatla F-line tia hriat thin chu Khatla ‘E’ hmingin Local Council thar pein an ramri chu Board of Councillor in a siamsak nghal bawk. Heng Local Council thar tur te hi Local Council inthlanpui February thla a neih turah hian tel ve hman tura ruahman a ni a. AMC hnuaia Local Council 78 chu heng Local Council thar tur pali (4) te nen hian 82 a tling dawn ta a ni.

via FB Chanchinthar : Sorkar Kumthar April 2012 atangin Kolasib District chhunga Sorkar hnathawk awmna chhungkua Job Card neite uluk taka enfiahin an Job Card cancel sak a ni dawn. He thu hi Jan 16 Turnipui palaiin Kolasib District DRDA Project Director Pi Maria CT Zuali, MCS a kawmnaah sawiin MGNREGS guidelines chuan inhlawhna dang hmulo leh neilo chhungkua, sum lakluhna security nei lote chuah in Job Card hi an nei tur a ni a ti a. Tunah hian sorkar hnathawk awmna chhungkua pawh chhiar tel vek chungin chhungkaw zat aiin Job Card hi a tam mek a. Hei hi Sorkar kumthar atang chuan a nihna tur ang tak anih theih nan hmalak tum a ni a ti.

Zawhna chhangin Project Director chuan hetianga hma an lakna turah hian a endiktu leh check tu atan hian VLA te bakah mi rintlak tur nia an ngaih ten hma an la dawn a. Hei hi an hna kallai reng a nih bakah VC lam atang pawhin mi neinung deuh chhungkua; Job Card neite chu enkawl an harsa deuh nia an sawi thin thu a sawiin khawtlangin awmlo an tih chin chu ngun taka enfiah tum a ni a ti bawk.   Tun dinhmuna a lan dan chuan hetia Job Card a tam zawkna chhan hi record an siam hnuhnun ber hnuah chhungkaw khat atanga fate indang thar an awm theih avang te, pem sawn Job Card VC hnena surrender lo leh in report lova, hmelhriat leh chhungkhatte hnena Job Card hlan chhawng ta mai mai te vang a ni thei a. Office-a an record hnuhnung ber October 2011 ah chuan Bilkhawthlir Block hnuaiah Job Card 12504 leh Thingdawl Block hnuaiah Job Card 5474 awmin a vaiin 17232 a awm mek a. Census 2011 erawh chuan hemi Block hnihah hian chhungkua 17232 in a chhinchhiah thung a. Chuti a nih chuan chhungkua aia Job Card a tamna chu 746 a ni dawn a ni.   Hetianga hmalakna tur hi Mizoram District DRDA ah chuan Kolasib hi a hmasa ber tur a nih dawn avangin mipuite ngaihven a hlawh hle a. An hnathawh tum dan leh tih dan turte office lam hian duangin VC/khua 47 ah hma an la dawn a ni.

via FB Zoram Khawvel : Jan 14 hian 26th Assam Rifle Inter Company Boxing Championship, AR Lammualah zawh a ni a, Mizoram Boxing Association chuan thawhpuiin Mizo boxer-ten hamthatna an hmuh theih nan hma an la nghal. 2009 Pro Fight bantamweight champion Vanlalhruaia (Khawkawn, Khatla South), PC Lallawmkima (Hliappui), H Rodinpuia (Armed Veng), Lalruatzela (College Veng) leh H Lalrindika (Kolasib)-te chu Assam Rifle-ah an lut ngei dawn niin a hriat. Anni hian tunhnaia sipai lak turah dilna an theh lut tawh a, 26th AR commandant, Colonel Gaurav chuan lak an nih ngei tur thu MIZBA hruaitute a hrilh a, a duh khawp Mizo boxer lak tur a hmu lo zawk.

MIZBA hruaitute sawi dan chuan Gaurav hian Pro Fight boxer 60 vel lak a inhuam tih a sawi a, mahse, tun tumah hian pawl 10 pass chin tan chauh dil theih a nih avangin sipaia lut duh Pro Fight boxer eng emaw zatin harsatna an neih phah a, a dil chhunte erawh an tling ngei a beiseiawm hle niin an sawi. March hian AR chauh ni lovin army dangah pawh sipai lak runpui a awm leh dawn a, hetah pawh hian Mizo boxer-te tan Gaurav a inhuam sang hle niin MIZBA hruaitute chuan an sawi bawk. Gaurav hi December 15, 2011 LPS Pro Fight final zan khan a hlim hle a, a nupui leh a fate nen a hmunah inhnek enin, an batallion boxer Abel Lalawmawia’n a vawi thum nan lightheavyweight title a humhim. Commandant hian Mizo boxer-te tan inhuamna thui tak a neih phah a, MIZBA hruaitute chuan bawhzuiin an hlawhtling ngei dawn niin a hriat.