Kuminah Serchhip-ah Phul lem phah tum

Nimin khan Serchhip DC Dr.  Lalrozama leh NBCC hotute UD & PA office-ah an inbia a, NBCC hotute hian Hmar Veng Complex Field-ah kumin chhunga Phul lem phah an tum thu leh March thla aṭangin Earthwork leh Foundation khawih nghal an tum thu an hrilh.  
UD &  PA hian NBCC hnenah karleh chhung khian Auditorium leh Complex field a Stadium sak zawmna tur cheng nuai 334.09 an release nghal dawn nia hriat a ni bawk. Khawtetlang a Tourist Lodge pawh DC hian Tourism Department lam hotute ngenin tun thla chhung ngei a hawn an rawn tum thu an lo hrilh niin thulakna chuan a tarlang.

High School zirtirtute tan Sensitization Workshop on Basic Sciences neih a ni

Directorate of Science & Technology buatsaihin nimin nileng khan Serchhip Hmar Veng YMA Hall-ah High School-a Science subject zirtirtute tan “Sensitization Workshop on Basic Sciences” neih a ni.
Nimin Workshop hi Pu F.Lalramchuana, Scientific Officer, Directorate of Science & Technology chuan kaihhruaiin Science subject zirtirtuten basic sciences ah hma an sawn belh a an chian lehzual theih nan workshop hi buatsaih anih thu a sawi a, Pu Zohming-thanga, DEO, Serchhip pawhin he hun hi hmanpuiin zirtirtute chu rilru pe tak leh hlawkna thar chhar ngei tura a duhsak thu a sawi a ni.

Workshop hi session 3-ah ṭhen a ni a, resource person pathum awmin ṭhen khatnaah Pu Lalhmingliana Hnamte, Associate Professor, Department of Chemistry, Government Zirtiri Residential Science College-in ‘Basic Concept of Chemistry’ ah zirtirna a pe a, ṭhen hnihnaah Pu Lalrin-tluanga Sailo, Assistant Professor, Department of Physics, Government Serchhip College-in ‘Basic Concept of Physics’ zirtirin, ṭhen thumnaah Pu S.Beihrosa Assistant Professor, Department of Zoology, Government Serchhip College in ‘Basic Concept of Life Sciences’ a zirtir bawk a ni.

Workshop-ah hian Serchhip, Thenzawl, Keiṭum, Chhingchhip leh Chhiahtlanga High School Science Teacher-te an tel a, hetiang Workshop hi Aizawlah neih tawh niin Lungleiah neih leh thuai tum a ni a, Mizoram chhunga District tinah la buatsaih tum a ni bawk.

New Serchhip-ah lirthei chesual

Nimin tlai dar 4:30 bawr vel khan PWD mual, New Serchhip-ah Pik-up a chesual a, vanneihthlak  takin thi leh hliam an awmlo hlauh.
He Pik-up hi Pu K.Lalthan-liana (CR Store neitu), Dinthar Veng tâ a ni a, an dawr aṭangin Brick 500 leh Polytank phurin a tlan chhuak a, Polytank a phurh hi a leitu Pu Lalṭhakima in (PWD Quarter)-ah an hlâng thla a, Brick hi Khawtetlang-a dah tur niin, Polytank an hlanthlak hnu-a a let leh tur inher rem laiin kawng thlangah hian a tawlh liam ta a ni.

He chetsualna bulhnaia awm te sawidanin, he motor hi a tawlh liam lai hian a ke a vir lo tih an sawi a, hei vang hian a brake-in tiding zo lovin, a inherna hi lei ṭhil a nih avangin a ke hi a tawlh niin rin a ni a, kawng ko-a a tawlh liam hma hret hian a pik-up-a chuang awmchhun leh a khalhtu ni bawk, Darngaihthangpuia, Keiṭum khua chu a zuang chhuak hman hlauh a, a tawlh liamnaah hian Pik-up hian Pi Ramnghingi te vawk in a hnâwl darh a, a chhunga awm vawk pakhat erawh a na lutuklo niin hriat a ni.

Motor hi a lum thui hle a, kawngthlangah feet 300 vel dawn a lumin, a chhe hneh hle a ni.