Zothlifim (Serchhip)

Subscribe to Zothlifim (Serchhip) feed
Serchhip Daily Newspaper
Updated: 2 hours 42 min ago

Kawngpui siamthat tura ngaih pawimawh thehlut turin ti

Fri, 06/05/2015 - 11:49

PWD Serchhip Division chuan Serchhip khawpui chhunga kawng siamṭhat tura an ngaih pawimawh te an hnena thehlût turin VC te an hriattir a, VC te chuan an huam chhunga hnathawh tur pakhat theuh, PWD in hnathawh tur a ruahman zinga telh tur  hi an theh lut tawh hlawm a ni.
Pu Zothangsang Intoate, EE PWD Serchhip Division chuan Serchhip-II Dinthar Veng aṭanga Serchhip-III Chhim Veng panna kawng alkatra luana siamṭhat tura Serchhip-III VC te rawtna chu nimin zing dar 6:30 khan Serchhip-II leh Serchhip-III VC te nen an enho a, UPC Hebron Biak in bul culvert leh a thlang lam te pawh ṭha taka siam a ṭul thu te pawh sawilan a ni a, culvert siam tur hian VC ten chak taka hma lak an tum thu an sawi bawk.

Serchhip-a Green Mizoram Day hman dan tur sawiho

Thu, 06/04/2015 - 09:29

SERCHHIP: June ni 11, 2015 (Ningani) a “Green Mizoram day 2015” Serchhip District-a hman dan tur ngaihtuahin nimin chhun khan Serchhip DC Conference Hall-ah District-Level Committee on Green Mizoram chu an Chairman Pi Juhi Mukherjee, IAS hovin an ṭhukhawm.
Nimina District-Level Committee on Green Mizoram ṭhukhawm hian kum kalta lama hmalak dan te thlirlet pahin kumin Green Mizoram Day hlawhtling taka hman a nih theih dan tur an ngaihtuah a, Serchhip khawpui bakah, Serchhip leh East Lungdar RD Block Development Officer te chu an bial chhunga thing phun tur pek an ni ang a, North Vanlaiphai SDO(C) leh North Vanlaiphai DFO ten an ṭhuthmunah he ni hman dan tur lo ruahman tur a tih an ni a, Thenzawl SDO(C) pawh hetiang bawk hian mawhphurhna pek a ni.

Kumin Green Mizoram Day thupui atan hian “I Dam Khawchhuah Nan Thing Phun Rawh” (Plant Trees for your survival) tih hman a ni a; Serchhip khawpui huamchhungah chuan Sawrkar Department hrang hrang leh Zirna In te, Tlawmngai Pawl leh NGO hrang hrang ten thing an phun dawn a, a bikin Eklavya School, Kawlritlangah leh Dawngzawl panna kawngpui sirah te beihpui thlak a ni ang. Hetih rual hian thing phun nun tawh sa pawh uluk taka chei ṭhat leh tur a ni a, thing ṭiak leh a hungna tur hmanrua te chu thing phunna tur hmunah Forest Department-in an dah vek ang a, School hrang hrang anmahni compound a phun tute chuan bialtu Range Officer hnen aṭanga ngaihven tur a ni. Kohhran leh Tlawmngai Pawl anmahnia a hrana phun duh te pawhin DFO, Thenzawl hnenah an mamawh zât an thlen ang a, an phunna tur hmun endik a nih hnuah pek an ni ang. SAGY hnuaia MP Model Village pahnih Khawlailung leh Chhiahtlang-a phun tur thing ṭiak 2000 ve ve pek an ni bawk ang.

Green Mizoram Day pual hian Photo Exhibition changtlung tak neih tum a ni a, Serchhip Photographers’ Association te nen ṭangrualin hma lak tur a ni a, School naupang ten khawlaiah poster an tar bawk ang.

Green Mizoram Day pual inkhawm hi Serchhip DC Conference Hall-ah June ni 11, 2015 zing dar 8:30 ah neih a ni bawk ang.

Serchhip-ah Boxing Training Centre hawng

Thu, 06/04/2015 - 09:28

Nimin chawhma dar 11 khan Mizoram Boxing Association (MIZBA) President Dr. Zorammawia chuan thla 3 chhung awh tur Boxing zirna – Boxing Training Centre chu Serchhip AH & Vety Rest House-ah a hawng.
Hawnna inkhawm tawite neihah thusawiin MIZBA Pre-sident Dr.Zorammawia chuan Mizoram Boxing-in bung thar kai an tum tih a sawi a, District hrang hrangah Boxing Training Centre hi hawn chhoh mek zel a ni a, tun dinhmunah Aizawl-ah Boxing Training Centre hi 5 hawn a ni tawh a, Champhai leh Kolasib ah hawn a ni tawh bawk a, nimin khan Serchhip leh Mamit-ah hawn niin, vawiinah Lungleiah hawn a ni ang a, tunkar chhungin Saiha leh Lawngtlai-ah hawn zui leh nghal a ni ang a, heng Training Centre-a Boxing zir te tan hian MIZBA leh LPS Vision ṭangkawp ten an Training zawhah inhnek puitham tak an ruahman dawn a ni.

Serchhip a Boxing Training Centre hi Serchhip District Boxing Association (SEDBA) ten an enkawl dawn a, Coach-ah Pu Lalrinawma (Ago-a) a ni a, ani hian zing leh tlaiah Boxing zirlai te hi a zirtir dawn a ni.

Nimin tlai dar 3:30 aṭang khan New Serchhip BRTF Camp hlui chhunga Serchhip Boxing Hall kawtah Boxing Training hi an ṭan nghal a, a ṭan ni hian Boxer 13 an kal a, Training tura inziaklut an awm belh mek zel bawk a, Training hi tunkar chhung chu a zawm thar theih reng niin SEDBA hruaitu ten an sawi.

Serchhip District-a zirna In 150-ah First Aid Kit sem

Wed, 06/03/2015 - 11:14

Serchhip: Nimin khan Serchhip DC Conference Hall-ah National School Safety Programme (NSSP) kaltlanga Serchhip District chhunga Zirna In 150 thlanchhuah te tan “Basic First-Aid Training” neih a ni a, First-Aid Kit sem nghal a ni bawk.
Serchhip District Bawrhsap Pi Juhi Mukherjee, IAS pawhin nimin hun hi hmanpuiin School hrang hrang aiawh zirtirtu kalkhawmte hmaah fuihna thu sawiin, an thil zir chu an tan leh an zirlaite tan mai bakah School leh khawtlang tan malsawmna a chanter tum ngei turin a chah a, First-Aid Kit an dawn chu “basic minimum needs” ni mahse an thil dawn tea tang khan mamawh leh tih belh ngaite an hriat belh zel dawn a ni a ti a, an rilru leh ngaihtuahna te ataka seng zui turin a chah bawk. Bawrhsap chuan Mizo Zirlaite chu thuawih thei tak an ni tih a mit ngeia a hmuh thu sawiin zirtirtute chu an zirlaite uluk taka an kaihhruai phawt chuan chhawr tlak tak tak an ni ngei dawn ani tih hre reng turin a chah bawk a ni. Bawrhsap hian thu a sawi zawh hian NSSP hnuaia school hrang hrangte hman tur “First-Aid Kit” a sem nghal a ni.

Nimin hun hi Pi B. Malsawmtluangi, Nodal Officer, DM&R in a kaihruai a, Pu Zothansanga Hmar, Master Trainer, DM&R hnen atangin First-Aid inzirtirna “Basic First-Aid Training” dawn a ni a, Pi Zotinkimi, District Project Coordinator, NSSP, Serchhip District in lawmthu sawiin hnu a khar a ni.

National School Safety Programme hi kum 2012 atanga kalpui niin Pilot Project atan Serchhip District leh Aizawl District thlan a ni a, kum 2014 June thla thleng tura ruahman anih hnu ah kum khat dang pawh sei leh niin kumin June thla hian a tawp ang. NSSP hnuaia School thlanchhuah te hi chhiatrupna laka inven leh hmachhawn dan chi hrang hrang zirtirna pek niin School Disaster Management Plan siam tir vek an nih bakah hmanraw chi hrang hrang pek an ni bawk a ni.

Govt. Serchhip High School-ah Mock Drill hlawhtling taka neih a ni

Wed, 06/03/2015 - 11:13

Disaster Management & Rehabilitation Department leh Serchhip District Disaster Management Authority ṭang-kawp buatsaihin nimin chawhnu dar 1:30 khan Government Serchhip High School naupang te nen chhiatrupna lo thlen huna chet lak dan tur lem chan “Demonstrative Mock-Drill”  hlawhtling taka neih a ni.
Nimin Mock-Drill ah hian lirnghing a lo thlen thut palh huna awmdan tur entir a ni a, zirlaite classroom-a an awm laiin lirnghing entirnan ‘siren’ tih rik a ni a, hetah hian zirlaite chuan chi-ai miah lova  classroom atanga tlanchhuah dan te, hliam tuar lakchhuah dan te leh bawihsawm dan bakah thil tul chi hrang hrang an zirho a, vawiin Mock-Drill hi NSSP hnuaia school thlanchhuah hrang hrang aiawh zirtirtuten a hmunah an chhim bawk a ni.

Pawikhawihnaa a tuartuten zângnadawmna an hmuh theih dan tur sawiho

Wed, 06/03/2015 - 11:12

Serchhip District Legal Services Authority bul tumin nimin chawhnu khan Serchhip DC Office Chamber-ah Serchhip Bawrhsap Pi Juhi Mukherjee, IAS hovin Serchhip District a a vawikhat nan “Victims of Crime Compensation Scheme” (pawikhawihnaa a tuartu/victim ten zangnadawmna an hmuh theih dan tur) chung-chang sawiho a ni.
Nimin ṭhutkhawm hi Pi Lalrochami, MJS, Senior Civil Judge in a kaihruai a, Serchhip Bawrhsap, Superintendent of Police, YMA Sub-Headquarters, Serchhip, MHIP Sub-Headquarters, Serchhip, MUP Sub-Headquarters, Serchhip, bakah Serchhip District Consumers’ Association aiawhte an tel a ni.

“Mizoram Victims of Crime Compensation Scheme 2011” in ruahmanna a siam angin BPL chhungkuaa mi misual kuta thite leh pawngsual tuartute chu zangnadawmna pek theih an ni a a a tuartu (victim) ten vanduaina an tawh dan azirin  Rs.5000/- aṭanga Rs.100000/- thleng zangnadawmna (compensation) hi pek theih a ni.

Nimin ṭhutkhawmah hian Serchhip District a case lut hmasa ber 2 – kum 2014 a naupang kum 8 mi pawngsuala thah tak chungchang leh kum 2014 veka naupang kum 6 mi pawngsual tawk te compensation pek dan tur ngaihtuah a ni.

Serchhip Sazuar Association THUCHHUAH

Wed, 06/03/2015 - 10:12

May ni 30, 2015 (Inrinni) khan Serchhip Bazarah sa thianghlim lo zawrh man chhuah a ni a. Hetiang thil a thleng hi keini Ser-chhip Sazuar Association chuan pawi kan tiin, thleng tawh lo se kan duh takmeuh a ni.
Sa thianghlim lo zuar lo tur hian member te kan inngen a, kan Association thu palzut te chungah chuan action pawh kan la thin a ni. Amaherawh chu, sa thianghlimlo zuartu hi kan member a nih loh avangin  a chungah engmah tih theih kan nei lova, he thilah hian Sazuar association chu kan fihlim a ni tih mipuite kan hriattir che u a ni.

Tin, sa thianghlim zawrh mai bakah dan lova Sa zawrh na hmun ni lova sa zuar lo tur pawhin kan member te kan ngen nawn leh bawk che u a ni.

Sd/- B.Rodingliana      Sd/- C.Hnemzuala
Secretary                  President
Serchhip Sazuar Association

COPTA dân bawhchhia mi 162 te Rs.6,060 chawitir an ni

Tue, 06/02/2015 - 11:26

Serchhip: Serchhip District Anti-Tobacco Squad report-a a lan danin nikum  World No Tobacco Day (May 31, 2014) leh kumin World No Tobacco Day (May 31, 2015) inkarah Squad drive vawi 19 neih niin, Dan bawhchhia mi 162 man an ni a, pawisa chawitir zat Rs.6060/- niin Treasury Challan hmangin Sawrkar-ah chhunluh vek a ni.
Serchhip District Anti-Tobacco Squad buatsaihin nimin chawhnu dar 2:00 khan CMO Conference Hall, Serchhip-ah “Stop Illicit Trade of Tobacco Products” (Dan lova Vaihlo, zuk leh hmuama sumdawnna i titawp ang u) tih thupuia hmangin khawvel pum huap vaihlo dona ni “World No Tobacco Day” hman a ni.

Serchhip District Bawrhsap Pi Juhi Mukherjee, IAS chuan he hun hi khuallian niin a hmanpui a, vaihlo leh a kaihhnawih tihtlem a pawimawhzia sawiin a bik takin sumdawng ten COTPA 2003-in an mawhphurhna leh tihtur leh tih loh tur a tih te pawh ṭha taka an zawm a ngai a ni a ti a, Vaihlo hlauhawmzia tarlanna thu leh a lem (pictorial health warning) Sawrkar Laipuiin vaihlo leh a kaihhnawih bungruaah te tarlang tura a tih chu a bik takin Myanmar leh Bangladesh atanga dan lova bungraw tawlhluh ruk ah te a awm ṭhin lova, hetiang thil zawrh hi Dan bawhchhiatna ani tih kan hriat thar leh a ṭul hle a ni a ti a, Serchhip District a naupiang hlim boral te hi a tam ber chu thâwkna dawt ṭhalo leh thawhah an nih avangin naupai laia vaihlo leh a kaihhnawih insum loh hian nghawng thui tak a neiin a hriat ani a ti bawk.

Bawrhsap chuan Serchhip District Anti-tobacco Squad te hnathawh that zarah Serchhip District chu Mizorama vaihlo khawih nasa ber District ni thin pawh pathumna ah a tla thla tawh a, hma kan sawn nasa hle tih a lan chian rualin hnathawh tur erawh tam tak kan la nei ani a ti bawk.

Serchhip-ah chuan kumin World No Tobacco Day hi Sumdawng (Vaihlo zuar te) puala hman niin Serchhip khawpui chhunga dawrkai/sumdawngte kohkhawm an ni a, Dr. Laldawngliana Sailo, CMO, Serchhip District hnen aṭangin vaihlo zawrh chungchanga an tihtur te zirtirna pek an ni a, Dr. Laldawngliana chuan sumdawngte chu vaihlo leh a kaihhnawih thil an zawrh reng rengah vaukhanna thuziak leh a lem (pictorial warning) a awm tur a ni a, hetiang awmlo an lo kawl a nih chuan pictorial warning bel tur DC Office leh CMO Office aṭang lei ṭhin turin a hrilh a, Vaihlo nghei duh ṭanpui ngaite tan Serchhip-ah anmahni enkawlna tur clinic hran awmlo mahse Daktawr ten an puih theih reng thu a sawi bawk.

World No Tobacco Day hi May ni 31 a hman tur ni mahse Pathianni a nih vangin nimin khan hman a ni a, nimin inkhawm hi Dr. Laldawngliana Sailo, CMO in a kaihruai a, inkhawm ban ah vaihlo mankhawmte Bawrhsap hovin tihchhiat a ni a, halral lovin tuiin an leih zawp a ni a, he hun hi Sumdawng/dawrkaite bakah MJA member ten an hmanpui a ni.

Serchhip Bazar-ah sa thianghlimlo nia hriat zawrh chhuah a ni

Mon, 06/01/2015 - 11:11

Inrinni khan Serchhip Bazar-ah Bawng sa thianghlim lo nia hriat hralh chhuah a ni a, a hralhtu-a puh hi Serchhip Police-ten an man hnu-ah Bail-a chhuah leh a ni.
Serchhip Police Station aṭanga Zothlifim thudawn danin, Bawng sa thianghlim lo hralh chhuaktua puh hi Pu Mawizuala, Tuikhuah veng a ni a, a bawng talh hi hmanni lawka note nei, damdawia enkawl lai nia sawi a ni a, hetianga damdawia enkawl lai hi Vety Doctor-ten mihring ei atan a thianghlim lo tih an sawi a, hetihlai hian a talhtute erawh chuan an ran talh hi mihring tan a thianghlim lo tih hrelovin an zuar chhuak niin an sawi tih thudawnna chuan a sawi.

Inrinni khan an sa zawrh hi engemawzat chu an hralh chhuak hman a, Bazar-ah hian Bawng sa leitute fimkhur tura an rawn au hnu-ah he sa leitu mi engemawzat chuan an sa lei tawh sa hi an thleng lêt leh a, hemi chungchangah hian Serchhip VC-IV chuan Ser-chhip Police Station-ah FIR an thehlut niin thudawn a ni bawk.

Orphanage Home naupang tuiah tla

Mon, 06/01/2015 - 11:08

Serchhipa Lalchhungkaw Unity kohhran enkawl hnu-chham in (Orphanage Home) aṭanga tlan chhuaka Mat lui-a tla Vanlalhriata ruang chu nimin tlai khan a tlakna li-ah hmuh a ni a, zaninah tlaivar-puiin vawiinah vuiliam a ni ang.
Thudawn danin Vanlal-hriata (15) hi Inrinni zing dar 4 vel khan a awmna Hnuchham In aṭang hian a ṭhiante pahnih nen an tlan chhuak a. Mat lui lamah kalin Inrinni chawhma dar 10 bawr vel khan lui-ah hian a tla ta a. A ṭhiante hian hawsanin tumah hrilh lovin Serchhip khaw chhungah an biru-a, anmahni zawngtu Police-te’n an hmuh hnu-ah Vanlalhriata tuia a tlak thu hi an sawi chhuak ta chauh a ni.

Vanlalhriata tui-a a tla tih an hriat hnu hian nimin khan  zawn nghal a ni a; tlai dar 4:15 vel khan hmuh a ni a. nizan khan Orphanage Home-ah tlaivar pui a ni a; tukina post-mortem a nih hnu-ah vuiliam a ni ang.

Amah hi Churachanpur khaw chhuak a ni a; Hnuchham Ina thawkte leh a chhungte an inbiak rem angin Serchhip-ah vuiliam a ni dawn a ni.

Khawlailung Village Development Plan pawm

Sat, 05/30/2015 - 11:15

SERCHHIP: Lok Sabha MP Pu CL Ruala’n SAGY Programme hnuaia Model Village atana siam tura a thlan Khawlailung khua tihhmasawnna tur (Village Development Plan) chu amah Pu CL Ruala hovin hovin SAGY Line department hrang hrangte leh Khaw-lailung Village Council aiawh ten nimin nileng khan DRDA Conference Hall, Serchhipah an sawihova; siamthat ngai te siamthat anih bakah belh ngaih leh paih ngaite thlitfim a nih hnuin lungrual taka pawm a ni.
Village Development Plan Document hi Pu CL Ruala, MP (LS), Pi Juhi Mukherjee, IAS, Nodal Officer, Pi Teresy Vanlal-hruaii, Charge Officer leh Pu K.Thangbawia, VCP, Khawlailung ten hming an ziah hnan a ni.

Khawlailung Model Village atana siamna tura ruahmanna (Village Development Plan) hi Line Department hrang hrang 20 te’n Khawlailung khaw mipui te nena inrâwn tlânga an siam a ni a, Line Department te hian Plan hrang hrang an siamte chu priority numbar 1, 2, leh 3 ah an thliar hrang leh a,  SAGY inkaihhruainabuah thla 12 chhunga thawh zawh vek tura tih a nih vangin Department hrang hrang Plan/Project siamte uluk taka thlirin hun tiam chhunga tihhlawhtlin theih tur chi a nih leh nih loh uluk taka sawiho hnu ah thutlukna an siam a ni.

Pu CL Ruala chuan SAGY Line Department official te thawhrimna leh ṭhahnemngaihna ah lawmthu sawiin Khawlailung chu khaw entawntlak (model village) a siam a nih ngei theih nan theihtawp chhuah turin a sawm a, Sawrkar laipuiin Model Village siamna tur hian sum a hranpa a a dah loh avangin development work sum tam tak senga thawh mup mup tura ngaihna hi a dik lova, mipuite rilru a hmasawnna duh tak takna thinlung tuh a pawimawh a, khawtlang inlungrualnate, thawhhona ṭha bakah mimal tin nunphung leh rilru sukthlek  a hmasawnna a awm a pawimawh ber a ni a ti a, SAGY hnuaia hmalaknate hi thla 12 chhunga thawh zawh vek tur a nih hlawm avangin Project lian tak tak siam a rem lova, Department hrang hrangte nen zaikhata luanga hmachhawpte tihlawhtling turin khawtlang hruaitute a chah a, khawchhung mamawh zualpui lo thawh hmasakna turin MP Fund aṭangin cheng nuai 10 a sanction nghal bawk a ni.

Model Village Development Plan hi May thla ral hma a Sawrkar laipuia thehluh tur a ni a, annin an lo endik hnu ah pawm tur chin an lo thliar fel ang a, July thla aṭangin hma lak ṭan nghal tur a ni ang.

Rajya Sabha MP Pu Ronald Sapa’n Model Village atana a thlan Chhiahtlang Village Development Plan hi kar kalta ningani Pu Ronald Sapa Tlau hova pawm alo ni tawh bawk  a ni.

Chhiatrupna laka chêt lâk dan inzirtirna buatsaih

Sat, 05/30/2015 - 11:13

Central YMA leh Disaster Management & Rehabilitation Department ṭangkawp chuan nimin khan YMA Sub Hqrs Serchhip hnuaia YMA member te tan Serchhip Hmar Veng YMA hall-ah chhiatrupna laka inven dan zirhona leh chet lak dan tur inzirtirna ‘Community Awareness Programme on Disaster Management cum Training for YMA Volunteer’ an buatsaih.
Dr. Lalrokima Chenkual, Head Faculty, ATI, CYMA Disaster Management Sub-Committee Vice Chairman hnen aṭangin chhiatna thlen theih dan hrang hrang leh inven dan te chipchiar takin zir a ni a, Pu Lalhruaitluanga, CYMA Disaster Management Sub-Committee Secretary hnen atangin chhiatrupna thlen thulha chet lak dan tur te chipchiar takin zir a ni a, hei bakah hian hliam tuar leh nunna chan enkawlna hmasa, First Aid chungchang inzirtir a ni bawk.

Chhiatrupna chungchang inzirtirnaah hian Central YMA aṭangin mi-9 an tel a, Sub Hqrs YMA Serchhip -ah hian Disaster Management Training chhuak YMA member 11 an awm tawh a ni.

Lirthei kal phal dawn lo

Fri, 05/29/2015 - 07:55

Serchhip District Bawrhsap chuan thuchhuah siamin June ni 1, 2015 (Thawhtanni) zing dar 9-12 (9:00 AM to 12:00 Noon) leh hemi ni vek chawhnu dar 2-4 (2:00 PM to 4:00 PM) chhung hian Army Recruitment Rally neih anih dawn vangin hemi hun chhung hian National Highway No. 54 in a tan tlang Sailiam, Serchhip leh Dawngzawl, Serchhip (Sailiam – Dawngzawl) inkarah lirthei eng chi mah kal phal a ni lovang.

Doctor sawn chhuah tum chungchangah YMA-in hma la

Tue, 05/26/2015 - 13:33

Serchhip JN Hospital-a Orthopaedic Doctor Dr.Robert Lalfakzuala chu Aizawl Civil Hospital-a awm turin sawrkarin transfer order a tichhuak a, Sub-Hqrs. YMA, Serchhip chuan   he thu hi an hriat ve leh Office Bearers Meeting nei nghalin Serchhip a doctor awm te sawn chhuah zel an ni leh, a thlaktu tur dah silo a tuna doctor sawn tura order thar awm leh ta chu an hrethiamlo tih an sawi a, Serchhip CMO Dr. Laldawngliana hnenah a thlaktu tur dah a nih hma chuan Dr. Robert hi release lo turin an ngen nghal.
Sub-Hqrs. YMA chuan thuchhuah siamin tun hnaiah Serchhip JN Hospital a Hmeichhia leh Naupang doctor awm ṭhin te sawnchhuah an nih avanga heng doctor te aiawh tur dah tura sawrkar an ngen mek laia hetianga doctor awmchhun sawnchhuah tum a ni leh ta chu a an lungawiloh thu leh ngaihsak an hlawh tawklo nia an ngaih thu sawiin a thlaktu tur dah a nih hma chuan Dr. Robert-a sawn chhuah chu an remtih loh thu leh a ṭul anga hma lak zel an tum thu an tarlang a, Doctor awmsa thlaktu tur awm lova sawn chhuah chu mipui harsatna thlentu a nih dawn avangin sawn chhuak rih lo tura thuneitu ten hma an lakpui an beisei thu an sawi bawk.

Sub-Hqrs. YMA hian Mizorama sawrkarna siamtu Congress Party Serchhip Block President Pu Lalramliana Sailo pawh hmuin hma laksak turin an ngen a, Pu Rama chuan Aizawla kal a Health Minister Pu Lal Thanzara sawipui vat a tum thu a lo hrilh niin thudawn a ni.

VC inthlanah an beisei phalo mahse Block Congress an lawm

Tue, 05/26/2015 - 13:31

Serchhip Block Congress Committee Executive Meeting chuan VC inthlan zawh takah an Block huam chhunga VC 10 awma VC 7 an la chu an beisei an phak loh thu an sawi a, mahse, mi leh sa an ngah loh vang ni lovin VC an lak lohnaah Party huang chhunga thawhhona ṭhat tawk loh vang a ni an ti.
Nimin khan an President Pu Lalramliana Sailo kaihhruaiin Hmar Veng YMA Hall-ah Executive Meeting neiin, VC inthlan an thlir letna an nei a, Serchhip-III, Serchhip-IV, Serchhip-V, Serchhip-VI, New Serchhip South leh New Serchhip North-ah te hneh taka seat an la chu lawmawm an tih thu sawiin, an Candidate vote-tu zawng zawng chungah lawmthu an sawi a. Chief Minister, Bialtu MLA Pu Lal Thanhawla’n Serchhip biala hmasawnna a thlen dan en in, Congress Party chu chak zui zel thei dinhmuna dingin ngaihṭhatthlak an tih thu an sawi bawk. Nimina Serchhip Block Congress Committee ṭhutkhawmnaah hin ah hian VC member thlan thar te tarlanna hun hman a ni a, District Congress Committee in June ni 15 hmaa Unit inthlan neih nise an tih chu June ni 8 ah inthlan nise tiin, Committee ṭhutkhawm zawhah hian Block OB ten inthlanpuitu tur an ruat nghal bawk a ni.

Zirlai titha te hnenah Cash Award hlan

Tue, 05/26/2015 - 13:30

Nimin khan BNRGSK Hall, P&E Veng-ah Govt. Serchhip High School aṭanga HSLC Examination 2015-a First Division-a pass mi 4 te hnenah Hriata Chhangte Incentive Cash Award leh Headmaster Award hlan an ni.
He hun hi Govt. Sechhip High School Headmaster, Pu S.Vanlalchhunga kaihruaiah hian Er. Lalhriatrenga Chhangte, Deputy Controller, Indian Bureau of Mines chuan a sum aṭangin zirlai tiṭhate hnenah hian pawisa fai Rs.5,000/- ṭheuh a hlan bakah Govt, H/S Serchhip Headmaster chuan ama sum aṭang bawkin zirlai tiṭha te hnenah hian Headmaster Award, Pawisa fai Rs.1,000/- ṭheuh a hlan bawk a ni.

He hunah hian Hriata Chhangte chuan sum leh pai hmanna ṭha ber chu lehkha zir kawngah a ni a ti a, taima taka lehkha zir ṭhin te chu Pathianin malsawmna a pe hreh lo a ni a ti a, nu leh pa kalkhawm te hnenah pawh he khawvelah kan ro awmchhun chu kan fate hi an ni a, chenna in ṭha leh mawi tak sakkṭ aiin chhungkua leh nungchang sak hmasak hi a ṭha zawk a ni tiin a chah bawk.

Govt. Serchhip High School aṭanga HSLC First Division-a pass te tana award a siam chu kum 3 chhung atan a nih thu sawiin, zirlai kalkhawm te chu he Award hi dawng ve ngei thei tura an zirlai a thahnemngai taka bei turin a chah a, Distiction a pass te chu Rs.10,000/- pek a intiam a, Mizoram puma Top 10-a lang te hnenah Rs.25,000/- a pek a tum thu a saiw bawk.

Cash Award hlan te hi Darchhuana, Lalnunṭhuami, Vanlalbiakmawii leh Isaak Lalhruaisanga te an ni a, he hunah hian MJA (SD) President, Pu Kapliana Pachuau, MZP President, T.Biakchamliana leh Zirlai nu leh pa te hnen aṭangin thusawi ngaihthlak a ni bawk.

Minister-in lei pahnih hawng

Mon, 03/30/2015 - 13:21

PWD changtu Minister Pu Lal Thanzara chuan Zirtawpni chawhnu khan Chhingchhip-Hmuntha Road a Tuikum Lei leh Chhingchhip-Thentlang Road a Tuikual Lei a hawng a, Tuikum Assembly Constituency bialtu MLA Er. Lalrinawma pawhin Khualzahawm niin he hun hi a hmanpui a ni.
Tuikum Lei leh Tuikual Lei te hi NLCPR Scheme 2006-2007 a Ministry of DoNER, Government of India in a sanction atanga thawh a ni a, heng hna pahnih te hi tender koh niin Mechfab Engineering Industries Pvt. Ltd., Guwahati hnenah pek a ni.

Tuikum Lei Built-Up Girder Bridge hi metre 45 a sei niin a loading capacity chu 24 tonnes (IRC Class 24R) a ni a, November ni 21, 2007 khan Lei sak hna hi thawh ṭan niin March ni 7, 2015 ah sak zawh a ni. Lei sakna work order hi cheng nuai 157.76 niin sak zawh a nih thleng hian cheng nuai 83.49 (52.80 %) chauh hmuh a ni a, Contractor hian ama sum hman belh bakah sum remchang dang dapkhawmin Lei hi a sak chhunzawm a ni.

Tuikual Lei Built-Up Girder Bridge hi metre 40 a sei niin Tuikum Lei atanga metre 450 a hla, Thentlang kawnga Tuikual Lui chungah sak a ni a, a loading capacity chu 24 tonnes (IRC Class 24R) a ni a, November ni 21, 2007 khan Lei sak hna hi thawh tan niin October ni 18, 2014 ah sak zawh a ni. Lei sakna work order hi cheng nuai 184.62 niin sak zawh a nih thleng hian cheng nuai 158.62 (85.90 %) chauh hmuh a ni a, Tuikum Lei ang bawkin Contractor hian ama sum hman belh bakah sum remchang dapkhawmin Lei hi a sa zo a ni.

Technical Report-a a lan dan in Project cost pumpui atanga 90 % hi Sawrkar Laipui tum tur niin, 10 % hi State sawrkar tum ve tur a ni a, heng Lei pahnih atana DoNER-in sum a pekchhuah ang ang doletna hi State Sawrkarin a release ve zel a, hna thawh zawhna tura mamawh zat DoNER atanga hmuh anih loh avangin hna zawh hun a khawtlai phah a, sum la tang rih te pawh release thuai anih tawh beisei a ni.

Heng Lei pahnih te hi a tirah chuan Bailey Bridge tura estimate leh sanction a ni a, Bailey Bridge hi temporary Bridge niin a chhuat (decking) ah thing leh thir chauh a hman theih a, Sawrkar hotuten Lei nghet zawk leh tlo zawk siam an duh avangin Built-Up Girder Bridge (BUG) in an thlak a, Built-Up Girder Bridge (BUG) hi permanent Bridge niin a chhuat (decking) ah cement concrete hman theih a ni a, a sei zawng in angah Bailey Bridge aiin a tlo zawkin a chak zawk a ni. Tuikum Lei hi dawh hnathawh kalpui mek anih laiin Hmuntha lam kam Ban (abutment) foundation ah tui awmna (water table) a pawnlang ani tih hmuhchhuah a ni a, a foundation nghet hmuh theih anih tak loh avangin design that leh niin Hmuntha lam kamah sawn hlat a ni a, Leri pawh hi a tira estimate aiin meter 5 in a sei phah ta bawk a ni.

Pages