Friday, February 5, 2016 - 14:15 - Zothlifim

Nimin khan Serchhip DC Dr.  Lalrozama leh NBCC hotute UD & PA office-ah an inbia a, NBCC hotute hian Hmar Veng Complex Field-ah kumin chhunga Phul lem phah an tum thu leh March thla aṭangin Earthwork leh Foundation khawih nghal an tum thu an hrilh.  

UD &  PA hian NBCC hnenah karleh chhung khian Auditorium leh Complex field a Stadium sak zawmna tur cheng nuai 334.09 an release nghal dawn nia hriat a ni bawk. Khawtetlang a Tourist Lodge pawh DC hian Tourism Department lam hotute ngenin tun thla chhung ngei a hawn an rawn tum thu an lo hrilh niin thulakna chuan a tarlang.


Friday, February 5, 2016 - 14:13 - Zothlifim

Mizoram Baptist Kohhran Hmeichhe Pawl (MBKHP) rorèl inkhâwm vawi 66-na, nimin BCM Tlabung Kohhrana neihah, Mizoram chhung hmun hrang hrang atanga paláite’n zu zawrh phalna tihtâwp a nih theihna tura chaw ngheia ṭawngṭai an rél.

MBKHP president Pi F Lalrochami kaihhruai rorèl inkhâwmah hian, Executive atanga thu ngaihtuah tur lût 2 leh Bial atanga lût 47 sawiho a ni a; thu rèl langsàr zual zingah zu zawrh phalna tihtâwp a nih theihna tura chawngheia tawngtai rawtna, chu lungrual taka pawm a ni a; Zu zawrh phalna titâwp tura sorkar ngen rawtna pawh rorél palaite hian lungrual taka pawmin, BCM hnuaia Fellowship Organisation Department (FOD)-a thlen leh phawt an rél a ni. MBKHP rorèlna sáng hi inkhâwmpui awm loh kumah neih thin a ni a, BKHP dinna hmun hrang hrang aṭangin rorel palai 460 vel an tel a, nakum rorèl inkhâwm chu Theiriat Pastor bialah nghah a ni.


Friday, February 5, 2016 - 14:07 - Zothlifim

BJP Mizoram Pradesh chuan an party member 8 tiamchin awm lovin an member nihna a hlihsak.

Nimin khan thuchhuah siamin an party member 8 te hian an party dan an bawhchhia ni-a sawiin, Primary member leh nihna tiamchin awm lovin an hlihsak thu an tarlang a, thuleh awm hma chu ban an ni, an ti.


Heng nihna hlihsak tak te hi State Vice President Pu Chalngura Jahau, State Core Committee Member Pu N Joshua, State Executive member ve ve Pu Lalrokima Lianhna leh Pu K Sangzuala, leh Member dang 4- Pu K Lalchhanhima, Pu PC Lalrinthanga, Pi Christina Lalrinpuii leh Pi Thluakho Solo te an ni.


BJP Mizoram Pradesh President Prof JV Hluna chuan nimin aṭang khan BJP District Committee zawng zawng pawh a thiah nghal thu leh a thar siamṭhat hma zawng thiah rih a nih thu an thuchhuahah chuan an tarlang bawk.


Thulakna tarlan danin, an nihna hlihsak te hian tunhma in party hruaitu an thlan thin laiin tun tumah hian BJP hmunpui lam atangin an party hruaitu tur chu inthlang lova ruat an nih tak avanga lungawilo an nih thu an sawi ve thung a ni.


Friday, February 5, 2016 - 14:03 - Zothlifim

Lady Gaga chuan tun kar tawp hian Super Bowl-ah National Anthem a sa dawn.

He thu hi Thawhlehni khan Associated Press kaltlangin puan chhuah a ni a, NFL chuan The AP hnenah hian Gaga hian “The Star-Spangled Banner” hla chu Levi’s Stadium, Santa Clara, California-ah a sa dawn a, hetah hian Carolina Panthers chuan Denver Broncos an hmachhawn dawn a ni.


Tun thla chhung hian Gaga hian inlanna tur dang a la nei nual a, nimin khan Grammys-a David Bowie sûnna hunah a perform dawn tih a puang a, tin, tun thla tawpah hian Oscar-ah “Til It Happens To You” tih hla a sa dawn bawk a ni.


Friday, February 5, 2016 - 14:03 - Zothlifim

Hyderabad Lab-a Scientist te chuan tunlaia khawvelin a buaipui mek, Zika Virus dona tur Vaccine chu khawvela a hmasa ber atan an siam tawh tih an sawi a, an sawi dan chuan tunah hian pahnih an nei niin an sawi.

World Health Organisation chuan Zika leh a kaihhnawih chungchangah hian Global Health Emergency a puang tawh a, Latin America ram 20 chuangah he virus hi a darh tawh a, hei mai bakah hian case vâng tak, mipat hmeichhiat aṭanga Zika Virus inkaichhawn a awm tih Texas, USA-ah report a awm tawh bawk a ni.


Hetianga khawvelin a buaipui mek natna hrik danna tur hi zawnga khawvela Company tam takin research an beih chhoh ṭan mek laiin Bharat Biotech International Limited, Hyderabad chuan Zika Vaccine hi an patent daih tawh tih an sawi a ni.


Dr. Krishna Ella, Chairman and Managing Director, Bharat Biotech Ltd. chuan, “Zika chungchangah hian khawvela vaccine company hmasa ber kan ni mai thei a ni, thla 9 liam ta khan he vaccine hi kan lo patent tawh a ni,” tiin a sawi a, Official-a Zika virus nung an lakluh hmangin Hyderabad company hian vaccine enchhin tur pahnih an siam a, mahse hun engemawchen chu ramsa leh mihringah te enchhinna neih a la ṭul dawn a, Dr. Ella chuan hemi tur hian sawrkar ṭawiawmna leh Indian Council of Medical Research (ICMR) puihna an mamawh thu a sawi a ni.


Dr. Soumya Swaminathan, pediatrician leh Director General, ICMR ni bawk chuan, “Bharat Biotech-in Zika vaccine enchhin tur an neih hi kan hre ve chiah a. Scientific thlirna aṭangin kan endik ang a, a thil tih theih te kan en dawn a ni. Hei hi Make in India atana entirna ṭha tak a ni,” tiin a sawi.


Dr. Ella chuan he vaccine hi thla 4 chhungin maktaduai khat an siam chhuak thei ang tih a sawi a, he vaccine hi rang taka hman theiha a awm theihna tura siam chhuah vat a nih theih nan Prime Minister Narendra Modi pawh direct-in inrawlh se a duh thu a sawi a, he vaccine hian Brazil mai bakah BRICS member (Brazil, Russia, India, China and South Africa) te a ṭanpui theih ngei a beisei thu a sawi a ni.


Friday, February 5, 2016 - 13:58 - Zothlifim

India rama Hockey-a thuneitu sâng ber, Hockey India chuan India National team hmei-chhe squad chu South Africa-a tour an neih tur thu a puang a, he India Squad-ah hian Mizo nula, Lalruatfeli Hnialum a tel a, midfield-ah a khel a ni.

India hmeichhe team te hian kum 36 hnu-a a vawi khatna atan Summer Olympic khel turin an qualify a, Summer Olympic lo thleng tur atana inbuatsaihna atana international match tam zawk khelhtir an duh vanga South Africa-a tour neihtir hi an ni a, February ni 20 – March ni 1 inkarah hian South Africa-a hmun hrang hrangah an inkhel dawn a, South Africa bakah Germany leh Scotland te chu match 2 ṭheuh an khelhpui dawn a ni.


Friday, February 5, 2016 - 13:58 - Zothlifim

Briton boxer, Amir Khan chuan May ni 7 khian Las Vegas-ah Mexican boxer, Saul Alvarez chu WBC world Middlewight title inchuh turin a hmachhawn dawn.

Kum 29 mi, light-welterweight champion hlui, Amir Khan hian nikum May thlaa point hmanga Chris Algieri a hneh hnu khan a la inhnek leh lova, kum 25 mi, Alvarez pawh hian nikum November thla khan Las Vegas-ah unanimous point decision-a Miguel Cotto hnehin he title hi a la a, Alvarez hian mi 48 a hmachhawn tawhah hnehna vawi 46 changin vawi khat chiah chak loh a la nei a ni.


Friday, February 5, 2016 - 13:50 - Zothlifim

SERCHHIP: Nimin khan Agriculture Department (Crop Husbandry) chuan Agriculture Committee Room-ah Quarterly Review Meeting an nei a, He Quarterly Review Meeting-ah hian Agriculture Minister Pu R. Lalzirliana chu Khuallian niin Parliamentary Secretary   Col. ZS Zuala chu Khualzahawm atan hman a ni a, khuallian, Agriculture Minister chuan Mizoramah Oil Palm chin uar chhoh zel tum anih thu a sawi.

Khuallian, Agriculture Minister, Pu R. Lalzirliana chuan Quarterly Review Meeting-a a tel ve thei chu lawm-awm a tih thu sawiin thawktute pawhin inpawhtawn nan leh harsatnate inhriatthiam tawnna atana hmang thiam turin a chah a. Agriculture Department chu State Planning Board lam pawhin an ngaipawimawh hle tih sawiin, mipuite tan chhawr-nahawm tur leh tihhlawhtlin theih tur project siam kawnga thahnem ngai lehzual turin Officer kalkhawmte a chah a.


Tuna Department hna-thawh langsar ber pakhat chu Oil Palm chin chungchang a ni tih sawiin, hlawkna kan tel tam lehzual nan a chinna hmun thlan thiam a pawimawh thu uar takin a sawi a, Oil Palm chu tui lak tur awm ṭhatna, Drip Irrigation hman theihnaah uar zawka chin chhoh zel tum a ni a ti a, lonei-tuten an thar chhuah te awlsam zawka an phurh chhuah theihna tur kawngpui laih uar ṭul a tih thu a sawi a, Agriculture Department officer te chu ruahmanna an siam danah mipuite hnen thleng phak leh tihhlawhtlin theih ngei tur chi thlang thiam turin a chah a ni.


Minister chuan Link Road tha neih a pawimawh thu pawh tarlangin mipuiten an chhawr theih turin Link Road tam zawk siam tura hmalak mek a ni, a ti a. Loneitute hlawhtlinna chu Agriculture Department hna-thawhah a innghah tlat avangin thawktute chu inlungruala taka thawkho zel turin a fuih bawk.


Khualzahawm Lt. Col. Z.S. Zuala pawhin thu sawiin Quarterly Review Meeting chu hmasawn zel tura ngaihdan leh pawmdan inhrilhhriatna hun ṭha a ni, a ti a.  Agriculture Depart-ment hian nasa takin kuthna-thawktute kan chhawk zang-khai thei tih sawiin thawktute chu an thiamnate loneitute tan hmang ṭangkai zel turin a chah bawk.


Review Meeting hi Agriculture Department (Crop Husbandry) Director, Dr. C. Lalzarliana’n a kaihhruai a. Deputy Director (Planning & Monitoring) Pu Rohming-thanga Colney chuan kum 2015-16 chhunga Central Schemes hrang hrang  hnuaia Agriculture Department hmalakna chipchiar takin a entir a. Heng Central Scheme hrang hrang – Rashtrya Krishi Vikash Yojana (RKVY), National Food Security Mission (NFSM), National Mission on Oil Palm, Oil Seeds & Pulses (NMOOP), Crop Insurance Scheme, National Mission on Sustainable Agriculture (NMSA), leh Mizoram sawrkar flagship programme NLUP bakah Sub Mission hrang hrang hnuaia sum hmuh dan leh Line Department-te hnena pek chhuah a nih dan a tarlang bawk.


He Review Meeting-ah hian District Agriculture Officer-ten kum 2015-16 chhunga an District chhung theuha an hmalak dan report an pe a, hei hi Panel Board Member-ten lo endikin hrilhfiah ngaite inhrilfiah tawna hun hman a ni.


Meeting-ah hian Additional Secretary, Pu Lalram-mawia bakah Department Officer thlan bik te an tel a ni.


Friday, February 5, 2016 - 13:08 - Zothlifim

Nimin chawhnu dar 1 khan MZP Pisapuiah MZP leh Joint Action Committee (JAC) on Inner Line Forest Reserve te chuan Assam State leh Mizo-ram state inrinna laia Inner Line Forest Reserve chungchang sawihona hun an nei.

He hun hi Pu Vanlalngaia, Chairman Joint Action Committee (JAC) on Inner Line Forest Reserve in a kaihruai a, sawihonaah hian Assam State leh Mizoram State inrina laia Inner Line Forest Reserve Sqm 509 Cachar Forest in a enkawl lai mek hi Mizoram Forest kutah a awm theih nana hmalak zel dan turte, tuna kan buaipui mek Inner Line Forest Reserve hi ramruak leh ramri buai a ni lova Mizoram chhung a mi a nih avangin Mizoram Forest kuta a awm a Mizo te hian kan enkawl a hun ve tawh thu te leh Inner Line Forest Reserve chin diktak chin fel a hun tawh thu te sawi a ni.


Mi tamtakin an hlauh ṭhin Inner Line Forest Reserve Mizoram in kan neih let chuan a area chhunga Hnamdang (Vai) an tam lutuk anga MLA hnamdang kan neih phah ang tih an hlauh chu a hlauhawm lova, Assam sawrkar hian Inner Line Forest Reserve-a awm te hi pass an pe lova Inner Line Forest Reserve a awmte hi an awm man siamin fee an chawitir ṭhin avangin Inner Line Forest Reserve hi Mizo te kuta a awm chuan dan hmanga an awm-lohna tura hmalak mai tur a ni.


MZP leh Joint Action Committee (JAC) on Inner Line Forest Reserve te chuan Inner Line Forest Reserve Sqm 509 Cachar Forest Cachar Forest-in a enkawl mek hi Mizoram Forest-in a enkawl let leh theih nan theihtawp chhuah a chak lehzuala hmalakho zel ṭha an ti a ni.


Friday, February 5, 2016 - 13:07 - Zothlifim

Kum 2015 chhungin Cham-phai, Kolasib, Mamit leh Ser-chhip District huam chhungah naupang kum tlinglo khuai-khem thubuai 111 ziah luh a ni a, thubuai ziahluh tur tam lutuk chu nimina Police Officer rual te ṭhukhawm chuan ngaimawh-awm an tih thu an sawi.

DIG Northen Range hova Police officer ten pawikhawih-na thlen dan an thlirletna, Crime Review meeting-a tarlan a nih danin, kum 2014 nena khaikhinin, naupang kum tlinglo khuaikhem thubuai ziahluh hi a pung nasa hle a, naupang humhalhna dan thar POCSO Act hman a nih tak vang a nih rualin, Mizo khawtlang nunah fel lo lian tak awma an hriat thu Police Officer te chuan an sawi a, hemi chungchangah hian tlawmngai pawl leh kohhran te nen zirchiana ṭan lak ṭul an tih thu an sawi.


Pawikhawihna dangah chuan kum 2014 aiin 2015 ah thu-buai ziahluh a tlem zawk a, lir-thei chetsualna pawh kum 2014 ah vawi 58 a thlen laiin 2015 ah chuan vawi 35 a thleng a ni.


Meeting kaihruaitu DIG Northen Range chuan District SP chu an huam chhung ṭheuhah silai siamchawp dapchhuah beihpuithlak turin a hrilh a ni. Dan leh thupek kenkawhna leh pawikhawihna thleng tur venna lama Police te hmalak dan chu nimina Police officer te ṭhukhawm hian ṭha thawkhatah an ngai a ni.


Pages