Chanchinthar

Saturday, January 24, 2015 - 10:20 - Zothlifim

Social Welfare Department changtu Minister Pu PC Lalthanliana chuan nimin chawhma dar 11 khan Serchhip Kawlri tlanga cheng Vaibelchhe 12 senga sak mek, Eklavya Model Residential School (EMRS) chu a tlawh a, kumin April thlaa Class ṭan hman ngei tura inpeih fel turin PWD, Social Welfare Department hotute leh a satu contractor te a hrilh.Minister zawhna chhangin Pu Lalzarliana, EE, PWD chuan April thlaa class ṭan hman ngei tura an inpeihfel dawn thu a sawi a, hna thawh tur rip zualpui chu zawhfel vek a nih tawh thu-in a chhang a ni. Pu Vanlalnghaka Zote, Dy. Director, SWD pawhin kumin April thla aṭang hian Class VI, VII leh VIII ṭan nghal tura ruahmanna an siam thu leh kumtin Class thar hawn belh zel a, Class XII zirna thleng hawn a nih tur thu a sawi bawk. Hnathawktu Contractor te pawhin theihtawp an chhuah thu leh Minister duh dan ang ngeia a hun taka an inpeihfel hman tur thu an sawi bawk a ni.


Minister chuan Eklavya School chu mirethei leh chhumchhia ten zirtirna changkang leh belhchian dâwl an hmuh theihna tura Sawrkar laipuiin ruahmanna a siam a nih thu sawiin, Lungleiah Eklavya School changtlung tak din a nih tawh thu te, kumthara Saiha District-a Eklavya Model Residential School din tura hma chak taka lak a nih thu a sawi bawk.


Eklavya Model Residential School hi Scheduled Tribe naupang rethei leh chhumchhia ten a thlâwna lehkha an zir theihna tur Sikul changtlung tak, Hostel awm nghal ni bawk tura ruahman niin, Sawrkar laipuia Ministry of Tribal Affairs in India Danpui (Constitution) Article 275 (1) hnuaiah a sakna tur sum hi a pe chhuak a, tunah hian Phase-I atan cheng Vaibelchhe 12 ruahman niin, Phase-I ah hian Administrative Building, School Building Block-I, Boys Hostel Block-I, Girls Hostel Block-I, thawktute chenna tur Type-I Quarters pakhat (4 units), Type-II Quarters pahnih (4 Units ve ve) leh Type-III Quarters (Principal chenna tur) pakhat sak a ni a , Internal Road leh Electricity pawh tel nghalin Internal link road hi laih zawh tawh niin black topping pawh hi zawhfel tawh a ni a. Electrict Transformer pawh bun fel tawh niin Electrict ban phun fel vek tawh a nih bakah Electric hrui nen thlun zawm vek a ni tawh a, tuizem lian Litre nuai 2 dawng 2 tunah hian sak mek a ni bawk.


Hostel hi Serchhip District chhunga naupang rethei leh chhumchhiate tana buatsaih niin an zirna atana senso zawng zawng bakah an mamawh dangte sawrkarin a tum sak vek dawn a, Social Welfare Department in a enkawl dawn a ni. Serchhip EMRS hmun hi 5572 Sq.m vela zau niin EMRS hi Lungleiah din a ni tawh a, Serchhip-a mi hi Mizorama a pahnihna tur a ni a, he School hi a hmuna enkawl turin sawrkarin District Bawrhsap kaihhruaina hnuaiah Committee a din a, School Principal, Serchhip CDPO, DEO leh Serchhip Sub-Headquarters YMA President te member an ni ang.


EMRS, Serchhip hi zawh fel a nih hnuah chuan Auditorium pakhat, Playground pahnih, Basketball Court pakhat, Girls Hostel Block 2, Boys Hostel Block 2nih, School Block 2, thawktute chenna Quarters Type –I 2, Type-II 7, Type-III `, Computer Room etc., awm tura ruahman a ni.


Minister hian Eklavya School a tlawh hnu hian Buangpui khaw daia khualzin te hiptu Tuirihiau chu tlawhin a hlutna leh a ziarang tichhe lova cheimawi dan tur a en nghal a ni.


Saturday, January 24, 2015 - 10:19 - Zothlifim

Nikum chhung khan Mizoramah rul chuk vanga thi mi 4 chhungte hnenah ralna cheng nuai 4 pek chhuah a ni. Environment and Forest Department hnuaia Wildlife Division-a thawktute sawi danin, rul chuk vanga thi te hi V.Lalhmingchungnungi, Lawngtlai vengpui, Zolianthanga, West Lungdar, Ramthangi, East Phaileng leh Lalthianghlima, Changpui khuate an ni a, an chhungte hnenah hian cheng nuai 1 ṭheuh hlan a ni.


Nikum chhung khan Ramsa kuta hliam tuar mi 22 hnenah ṭanpuina `2,25,360/- pek chhuah a ni a, ramsa in mihring ran vulh lai a tihhlum sak mi 1 hnenah `5,000/- pek a nih bakah ramsa in huan thlai a tihchhiatsak mi 427 hnenah `8,49,860/- hnenah ṭanpuina pek a ni bawk a, tihian ramsa avanga nikum chhunga zangnadawmna leh ṭanpuina pek chhuah hi a vaiin `14,79,860/- a ni a. He’ng tanpuina sum hi Finance Commision 13-na sum ruahman aṭanga pek an ni.


Wildlife thuneitute chuan ramsa avanga hliam tuar zingah savawm beih tawk an tam ber ṭhin tih an sawi a. Mi tam tak ramsa hnuhma ni silo ramsa-in huan thlai a tihchhiat sak anga sum hmuh tum an awm ṭhin tih sawiin, hetiang tih ching an awm thin hi pawi an ti h thu an sawi a ni.


Saturday, January 24, 2015 - 10:15 - Zothlifim

Nimin khan Pu Lalhmansanga, MCS, Election Officer hovin Serchhip DC Meeting Room-ah kumin Village Council inthlan lo awm tura Serchhip khawpui chhunga Electoral Roll siamṭhat hna chu Serchhip khawpui chhunga Village Council te leh Village-level Officer ten an enho.Village Council Electoral Roll siam turah hian Assembly Electoral Roll chu Draft Roll a hman tur a ni a, Assembly Electoral Roll hi Village Council ramri ṭhen milin thliar hran leh vek a ni ang a, uluk taka enfel a nih hnu ah January ni 30, 2015 hian tarchhuah a ni ang. Serchhip khawpui chhungah hian Village Council thar 4 siam a ni.


Saturday, January 24, 2015 - 10:14 - Zothlifim

Republic Day DC’s Volleyball Running Trophy, Vengchung Volleyball Court-a khelh mekah nimin khan hmeichhe lamin final khelin, Vengchung Volleyball Club an champion a, vawiinah mipa lamin final an khel ve leh ang.Nimina Hmeichhe Final khelhah Vengchung VC hian Friends Club, New Serchhip hnehin an champion a, Mipa Semi-Final-ah Vengchung VC (Green)-in Vengchung VC(Blue) hnehin Final an lut a, semi-final pakhat zawkah Friends Club, New Serchhip-in Chanmari VC an hneh bawk a, vawiinah Vengchung VC(Green) leh Friends Club-ten final an khel ang.


Saturday, January 24, 2015 - 10:12 - Zothlifim

Nimin khan Central YMA, Kolasib Sub-Hqrs YMA leh Serlui Group YMA hruaitu ten Buhchangphai Ramtharzaua Pu RK Laldawngliana leh Pu Kapzuala te Leilet an tlawh.

Nikum April ni 27 khan Buhchangphai Ramtharzaua Pu Kapzuala leh Pu RK Laldawngliana te leilet enkawltu te chu Assam Police leh forest ten vauin an IN te an tihchhiatsak a, April ni 30 khan Home Minister-in a tlawh hnuah an In te chu hnatlanga sak ṭhat leh a ni a. Kumin January ni 19 khan Assam Police leh Forest te bawk chuan Leilet enkawltu te chu chhuak turin an rawn ti leh ta a. Hetianga Assam lamin harsatna an siam leh tak avang hian nimin khan Central YMA, Kolasib Sub Hqrs. YMA leh Serlui Group YMA hruaitu mi ṭhahnemtakin thil awmdan thlithlaiin helai hmun hi an tlawh a, YMA Flag an zar nghal bawk.


He hunah hian Central YMA president Pu Lalbiakzuala chuan thusawiin, state ṭhenawm ten Mizo te ram an rawn chuhpui ta a, chuvang chuan Central YMA chuan helai Assam Forest leh Police ten a Assam ram nia an hriat chu Mizoram chhung ngei a ni tih puang turin an kal tih a sawi a, hun kal zelah pawh helai hmun hi Mizoram ngei a ni tih hriat a nih theih nan an humhalh zel dawn a ni a ti a, he buaina avanga helai hmuna duty police niminpiah lama koh lêt te pawhin venhim hna thawk zui zel se an tih thu YMA hruaitute chuan an sawi a ni.


Saturday, January 24, 2015 - 09:56 - Zothlifim

Ni 2 chhung awh Hmarchhak biala HIV/AIDS dona kawnga sawihona ‘NE Strategic Action Plan Consultative Meeting’ Hotel Regency conference hall-a neih chu niminpiah tlai khan Chief Minister Pu Lal Thanhawla chuan khuallian niin a khar.

Chief Minister Pu Lal Thanhawla chuan HIV/AIDS hi alo bengkhawn ngai vak loh thu sawiin, hri hlauhawm tak a nihna hian hriat loh theih loh a ni a, India ram pumah hmarchhak state-ah te a hluar bik hi kan khawtlang nun leh mahni ṭheuh inbihchian nan kan hman a ṭha hle a ni a ti a. Chief Minister chuan tun hnaiah HIV dona tur leh a veite enkawlna tur sum kan dawn ṭhin bakah thisen bag te, testing kit te, OST leh Anti Retroviral Therapy drugs te nasa takin a tlahniam a kan harsat phah hle a ni a ti a. Heng harsatna te hi hriatpui a chinfel sak thuai turin thuneitute chu a ngen nghal a ni. HIV/AIDS hluarna bik Manipur, Nagaland leh Mizoramah te hian zam lova thapui thawh a, ṭanrualna nen he hri ṭihbaiawm tak hi hneh theih a ni a ti a, amah pawhin Chief Minister a nihna angin a dona kawngah leh a veite enkawlna ah theihtawp a chhuah dawn tih sawiin, kan ṭanrual chuan AIDS hi kan hneh thei a ni a ti.


Chief Secretary Pu Lalmalsawma chuan HIV darhzauna chhan pawimawh tak pakhat chu kan khawtlang nun a zir a ni a ti a, Mizoramah hian district 4-ah a hluar bik bawk tih a tarlang a ni.


Dr. NS Kang, Addl Secretary, NACO, Govt of India chuan hmarchhak bika HIV darhzau tur vên nan ruahmanna thar new concept hman a nih tur thu a sawi a, Pu Arun Goyal, Principal Secretary, Health & Family Welfare, Govt of Mizoram pawhin special address a nei bawk.


Consultative Meeting hi a vawi 3-na leh a final round a ni a, NACO, Union Ministry of Health & Family Welfare leh MSACS te buatsaih a ni a, Centre for Disease Control leh Voluntary Health Services tena bultum a ni.


Saturday, January 24, 2015 - 09:56 - Zothlifim

MNF Vice President, Dr. R.Lalthangliana chuan Ningani chawhnu dar 2 khan tun hnaia Assam Police leh Forest mi ṭhenkhatin Mizoram chhungah lut a, Buhchangphai leh a chhehvel hnathawktu, Mizo huan lo ram neite an tih ralkhelhna hmun a tlawh.Nimina MNF thuchhuah chuan Dr. Thangtea hian Buhchangphai-a Forest Department-in beat post a siamte enkawlzui a nih loh vanga luahtu awm lova, a rawp chhe vek mai chu thuam ṭhat leh a ṭul thu a sawi a, hetih rual hian Assam leh Mizoram inri-na bulah Police outpost a rang lama siam vat ni se a duh thu a sawi a, Buhchangphai a police pasarih lek an awm pawh helai khaw mipui bakah leilet leh huan neitu te tan thlamuanpui tham nia a hriat loh thu a sawi bawk.


Inter-state boundary-a buaina chhe zawk leh ṭul lova inkahna a thlen loh nan, Dr. Thangtea chuan thuneitu sang level-ah dawhkan khat kila sawi vat ṭul a tih thu a sawi a, hmalakna mumal neih loh vanga buaina a chhuak fo mai chu tih takzeta sawrkar thuneitu te’n an vei zui a ṭul tawh thu a sawi a. Ramri issue hi politics thila thangṭhat hlawh tumna chi pawh a ni tawh lova ram hmangaihna thinlung nen ramri hrula chengte sa himna ngaih-tuah chungin mutmawh hnar-mawhah sawrkar hian nei se, a duh thu a sawi.


Hetih rual hian MNF chuan January ni 22, 2015-a Aizawl leh District Hqrs. hrang hrang bakah khaw engemaw zata “MIPUI THLAVANG HAUHNA KAWNGZAWH” hlawhtling taka a neih theih avang leh Mizoram mipui te ṭawiawm-naah lawmthu a sawi a, mipui thlavang hauhna kawngzawhah MNF chu a tawp mai dawn lo tih an sawi a, MNF-in congress sawrkara a phutte a hlawhtlin ngei theih nan, theihtawpa nawr zui zel a tum a ni.


Saturday, January 24, 2015 - 09:52 - Zothlifim

India rama Industry pawl lian tak Confederation of India Industry (CII)-in an buatsaih, in / kawngpui / lei sakna hmanrua lian construction equipments phochhuahna, hmarchhak puala ni 27 Feb – 1 March 2015 chhunga Guwahati-a neih tur ConMac 2015 sawihawnna chu niminpiah tlai khan Hotel Floria, Dawrpui ah Health & Family Welfare Minister Pu Lal Thanzara’n a hawng.

Minister chuan thusawiin Mizorama kan la hmelhriat loh CII- ten Company lian tak tak sawm khawma khawl leh hmanraw thar leh lian tak tak pholanna, hmarchhak puala Guwahati-a an buatsaih tur chu lawmawm a tih thu a sawi a, Mizo contractor leh engineer te pawhin chhim ve ngei se an hlawkpui a beisei thu a tarlang a, Mizo contractor te pawh hmasawn zel tura khawl thar leh ṭha zawk hman tuma inbuatsaih turin a chah bawk.


Saturday, January 24, 2015 - 09:51 - Zothlifim

State ṭhenkhata Swine Flu lên mekna zinga Gujarat-ah chuan darkar 24 kalta chhung khan mi 5 an thih leh tak avangin he State-a thi zat chu 12 an tling ta a, State Health Department-in a sawi danin, hospital hrang hrang a swine flu vang a lût zât chu 92 an ni. Rajashthan ah pawh swine flu vangin ni 22 kalta chhung khan mi 15 an thi tawh a, Delhi-ah pawh kumin a swine flu vang a damlo 179 zingah mi 3 an thi tawh a ni.


Hetihlai hian, Telengana ah pawh he hri leng vang a damlo damdawiin hrang hrang a enkawl mek te nimin khan Delhi atang a mithiam team te’n an tlawh a, member 3 awmna team hian he state a swine flu a darh chhan an hmuh dan report sawrkar laipuiah an thehlut dawn a ni


Saturday, January 24, 2015 - 09:48 - Zothlifim

Dân pangngai February aṭanga March thla chawhma lam khua a han ṭhal meuh hi chuan keini Serchhip khua hi chuan keimahni khaw ram ngei mai hi kan ti kâng duai duai zel mai zawng a nih hi. Khua a ṭhal rei leh ram a kâng nasa a, luidung nungcha te an rethei ting mai bawk a, khua a fur hma deuh leh kan kâng tlêm a, luidung nungcha te an rethei reilo deuh ni maiin a lang. Hei tunah pawh khua a ro leh ta hle mai, eng tak lo thleng leh ang maw. Ram dang leh hmun dang chu sawi loh Vancheng ram, Serchhip lam ep phei hi chu kumtin a kang ringawt mai a ni. Kang vâp al leh hnim hnah chawrno hi Sakhi leh Saza ten an tlân ṭhin a, chu chu akn kâp ṭhin an ti. Ram hâltu leh Sa kâptu te hi thuhmun tak maw?Nikum 2014 phei kha chuan ram a kan nasat zia kan hre ṭheuh awm e. Lo hâltu pawlawh leh fimkhur lo ten ram an tikâng a, vanduai vâng liau liaua mei chhuah palh avangin a kâng thei bawk a, misual filawr vantlang pawikhawih hreh lotu ten an hâl lui bawk ṭhin an ti.


Nikum khan hmun hran hranah ram a kâng a, keima hriatchian ve-ah chuan Bawngchawm ram Mualzen, (LAD Bawlhhlawh paihna in lam mual) aṭanga Sailiam kawn thleng kha a kâng fai vek chu a ni ber a. Ram a kan ni hnihna aṭangin khawtlang huapin ram kâng ṭhelh hnatlang neih a ni a, a hah a te vek vek chu an hah ngawt ang.


Kâng ṭhelhtu hah zual ṭhenkhatin “Ram neituten ṭhelh ang hmiang, thing leh mau kan lâk hlek pawha hauh kan tuarnaah keinin mawhphurhna kan nei lo” tia an lo phun pawh kha a awm e. Kum 1991-92 vel aṭanga NLUP ram atana mimalin an humhalh zawh thawthang avangin kan khaw ramchhungah hian ram chuang (vantlang ram) sawi tham a awm lova, han en erawh chuan ram cheibawl loh a tam em em si a, a neituten an hauh ang ngei hian chhungkaw eibar lâk nan chuan ṭangkai se chuan heti em em hian ram a kâng lo tur. Hetianga hman ṭangkai loh ram tam ta lutuk pawh hi thuneituten chinfel dan ngaihtuah se a ṭha ngawt ang.


Eng pawh nise, mimal ram a ni emaw, vantlang ram a ni emaw, ram kâng hi a pawi a, Media hrang hrang aṭanga Awarness Campaign neihin awmzia a nei bawk si lova, hetiang hian rawtna siam ta ila. Keini Serchhip huam chhunga ram kâng ṭhin chu kan hre ṭheuh a, February thla aṭanga 15 May thleng hian henglai hmun veng tur leh thlithlai tur hian casual employees lak nise, ram a kan chhiat ṭhin nena khaikhin hian a sum senso a tam vak lo bawka thuneituten remchang siam thei se a duhawm hle mai. Tin, hei vanga ram kâng lova kan siam thei a nih chuan a hlâwk viau lo’ng maw?


A tawp berah chuan ram tikângtu hi hria a zêplo turin mitin ṭangrual ila, ram tikângtu thuneitute hrilh theitu an awm phei chuan lawmman ṭha tawk siam nise, mitin kan fimkhur phahin ram tihkan pawizia kan hre ṭheuh bawk ang.


Pages