Chanchinthar

Friday, July 3, 2015 - 12:06 - Zothlifim

SERCHHIP: India ramchhunga cheng ten kan hman tangkai vek theih tur “Digital India” hnuaia ruahmanna te mipuite hnena puanzar beihpui thlakna Hapta Khat chhunga hman tur “Digital India Week” Serchhip District-a hawnna inkhawm chu nimin khan Serchhip DC Conference Hall-ah buatsaih a ni a, Serchhip Bawrhsap mawhphurhna la mek tu Pu VL Remliana, MCS, Addl. D.C., chuan khuallian niin “Digital India Week” hi a hawng a ni.

Hawnna thu sawitu khuallian chuan “Digital India” thil tum leh ruahmanna siam te chu ramchhung hmasawnna atana ṭangkai tak tur a nih bakah Good Governance siamna atan a pawimawh hle dawn a ni a ti a, Sawrkar hnathawkte hi mipuite tana thawk kan nih avangin mi zawng zawng inangtlang veka kan en a pawimawh a, mirethei leh hausa thliar hrang lova danin a phal chinah ṭha taka dawngsawng vek ṭhin tur kan ni a ti a, mipui rawng kan bawl kawnga hmalakna chi hrang hrang te rang tak leh a hun dik taka kan chinfel zung zung theihna kawng Digital India hian a hawng dawn a, a thiltum hi a hlawhtling a nih phawt chuan sawrkar hnathawk tumah inthlahdah ngam chi pawh a ni dawn tawh lo a ni a ti bawk. Sawrkar hnathawk LDC chin chunglam chuan an hnathawhnaa an ṭangkaipui theih tur chin tal Computer thiamna neih ngei ngei a pawimawh thu a sawi bawk.


Pu Lalruatmawia, District Informatics Officer, Serchhip District-in Digital India Project chungchang sawifiahna hun hmangin Digital India chuan India mipuite nunphung hmasawnna kawngah nasa taka thlak danglam a tum a, kum 2019-ah chuan a hlawhtlinna hmuh hman tumin thapui a thawh dawn a ni a ti a, kum 5 chhungin he hmalakna hnuaiah hian mi nuai 18 chuangin eizawnna thar an hmuh beisei a ni a, he ruahmanna hnuaia peng hrang hrang Digital Locker, e-Governance leh ruahmanna chi hrang hrang te hmanga hmasawnna thlen tir a nih dawn thu leh Digital India hnuaiah chuan thingtlang khua zawng zawng broadband internet connection hmanga thlun chhuah vek tum anih thu te, sawrkar leh mipuite indawrna pawh internet hmanga tihchangtlun anih dan tur te leh ruahmanna chi hrang hrang bengvarthlak tak tak a sawi a, mipuiten heng ruahmanna tha tak tak te hi an hriatchian theih nan media lam te nen pawh tan lak a tul hle a a hriat thu a sawi bawk a ni.


Nimina “Digital India Week” hawn rual hian e-District, Serchhip pawh hawn nghal a ni a; Pu Lalhruai-tluanga Sailo, e-District Manager, Serchhip District in an hnathawh dan kalphungte sawifiahna hun a hmang a, tunah hian DC office dawr hranpa ngai lovin e-District kaltlang hian online in Income Certificate, Caste Certificate leh Residential Certificate te a tihfel theih tawh a, ILP erawh thawktu indaihlohna vangin an kalpui thei rih lo thung. Nimin aṭang hian e-District kaltlang hian Social Welfare Department hnuaia NSAP tanpuina leh Local Administration Department hnuaia Housing Loan dilna bakah hna dilna (Employment Service) te chu buaipui theih a ni tawh ang.


Nimin inkhawm hi Pu L.Rinliana, MCS, SDO(Sadar) in a kaihruai a; sawrkar hna-thawk sawm bikte leh chan-chinbu mi te an kal tha hle a ni.


Friday, July 3, 2015 - 12:05 - Zothlifim

Storage point price ennawn a nih avangin 30.6.2015 – 1.7.2015 atang khan a hnuai ami ang hi Mizoram hmun hrang hranga tuialhthei man thar chu hetiang a ni.


petrol-price


Friday, July 3, 2015 - 12:04 - Zothlifim

Nimin khan Serchhip-a Salvation Kohhran ṭhalai Pawl, Salvation Army Youth te chuan Founders Day pualin Serchhip damdawiin Blood Bank-a dah turin thisen unit 30 an pe.

Salvation Army Founder Day puala Serchhip damdawiin Blood bank-a dah tura a mamawh apiang hman tura a thlawna thisen petu te hi mipa 23 leh hmeichhia 7, an vaiin mi 30 an ni a, thisen te hi Serchhip damdawiina thawktu ten Serchhip Corps YP hall ah kalchilhin an laksak a ni.


Salvation Army Founders Day hi Khawvel puma Salvation Army kum 150 tlin champhaphak a ni a, Founder Day pual hian kum tin thisen pek runpui hi neih ṭhin a ni a, tun ṭumah pawh hian Serchhip CO Bial, Thenzawl CO bial leh Chhiahtlang CO biala SAY member ten thisen hi pein SAY member mi 70 an kalkhawm a ni.


Friday, July 3, 2015 - 11:59 - Zothlifim

Aizawl khawpui tâwt lutuk tihziaawm dan tur kawng dapin nimin chawhnu khan Chief Minister’s Conference Hall-ah sawrkar mi pawimawhte an thukhawm.

Meeting hi Principal Secretary to Chief Minister Pu Lalram Thanga, chuan kaihruaiin Aizawl khawpui ṭhan chak dan leh chumiin a ken tel, traffic jam nasa lutuk tihziaawmna turin Mizoram Chief Minister Pu Lal Thanhawla’n kawng hrang hranga hma a lak chhoh dan a tarlang a. Kawngpui tihzauh belh ngaihna a awm tawh loh avangin leihnuai train (subway car) te, cable car te leh monorail te thlengin tih theih dan a awm em tiin kawng dap a ni tawh a. Amaherawchu, mipui mimirin chuan manah sum tam tak sen ngailova public transport an hman ṭangkai theih tur leh Aizawl khawpui leilung nena inhmeh ber tura ngaiin khawl hmanga mipui vahvelna tur Automated People Mover (APM) hrang hrang zingah Cable Liner te pawh bihchian ṭha an ti a. Hemi atan hian sawrkar laipui Ministry of Finance hnuaia Department of Economic Affairs (DEA) dawrin, Asian Development Bank sum hmangin khawpuia mipui vahvelna, Urban Transport-a harsatna sukiang tur hian hma lak tan dan tur an ngaihtuah ta a ni.


DEA leh ADB nen hian hun rei tak inbiakna neih a nih hnuah Master Plan siam turin sawrkar laipui chuan US company pakhat CDM Smith chu a thlang ta a. ADB aiawh traffic lam mithiamte leh CDM Smith aiawhte hian Mizoram rawn thlengin a hmunah hma lak dan tur an rawn zirchiang dawn a, nimin meeting-ah hian sawrkar department hrang hrang bakah Aizawl Municipal Council aiawhten hmalak dan tur an sawipui a ni.


Meeting-ah hian Rajya Sabha MP Pu Ronald Sapa Tlau, AMC Chairman Pu CT Zakhuma leh AMC aiawh dangte, UD&PA, Transport, Traffic, PWD leh Power & Electricity Department official-te bakah ADB leh CDM Smith aiawh mi pariat an tel a ni.


Friday, July 3, 2015 - 11:56 - Zothlifim

Aizawl Municipal Council chuan hun engemaw chen Property Tax khawn a chawlh-san hnuah July ni 1 aṭang khan a khawn chhunzawm leh.

The Mizoram Municipalities (Property Tax Management) Rules, 2014 angin AMC chuan Unit Area Method hmangin thlahlui ni 16 leh 17 khan AMC Ward No. I, Durtlang leh Leitan Local Council huam chhungah Property Tax hi a khawn ṭan a. Ni 2 chhung hian cheng nuai 2 chuang a khawn hman a, ram ruak leh building-in a luah bak ram âwl aṭanga chhiah lâk te chu sâng lutuk deuh nia hriat a nih avangin AMC chuan a chawlhsan lailawk a. Mizoram sawrkar pawhin hei hi hriain ram ruak leh in bul ram âwl aṭanga chhiah la tel lovin, building aṭang chauha chhiah la rih phawt turin AMC chu a hriattir a ni.


Sawrkar thu chhuak thar ang hian AMC chuan July ni 1 aṭang khan Ward No. I huam chhunga Local Council pahnih, Durtlang leh Leitan-ah Property Tax khawn hi a chhunzawm leh a. AMC chuan Durtlang leh Durtlang Leitana chhiah an lo lak tawh zawng zawng te chu an pekir leh vek phawt a, building chhiah chauh pe turin an chhût nawn leh ta a ni.


July ni 1 khan mi 170-in Property Tax hi an pe hman a, AMC hotute sawidanin an lo khawn hmasak kha pek kir leh phawt a ngaih avangin duh angin chhiah pek hi a rang thei lova, veng dang an kal hun chuan a rang deuh tawh turah an beisei a ni. Ward No. I, huam chhunga veng dang Selesih, Durtlang North, Muanna Veng leh Zuangtuiah te karleh khian an khawn chhunzawm leh ang.


AMC hotute sawidanin Property Tax hi a duh tan AMC Office Thuampuiah englai pawhin a pek theih bawk a ni.


Friday, July 3, 2015 - 11:52 - Zothlifim

Sawrkar Department  – Home Department leh Information & Public Relations chuan mipui tana rawngbawlna kawng tichak turin inhnaih lehzuala thawhho nise an ti.

Nimin khan I&PR Secretary Pi Rosangpuii Office Chamber-ah Department pahnih aiawhte hi an ṭhukhawm a. He hunah hian Secretary,  I&PR chuan an Department chu sawrkar kaihza venga fimkhur leh dik taka thu kal lam, haw lam mipui hnena an puanzar thin dante a sawi a. Mizoram Police ten suahsualna dona leh misual man kawnga an hnathawhte vantlang hriata puanzar danah thudik leh belhchian dawl pek chhuah anih theih nan fimkhur taka inrawntawn thin nise tha a tih thu a sawi a ni.


Suahsualna dona ah te, hnam, chi leh chi inkara innghirnghona chawk tho thei thilthleng a awmin a bik taka fimkhur a ngaih thu te meeting ah hian sawilan a ni a, mipui ten thu dik, innghahna tlak rang taka an hriat theih nan te, rinthu leh zeldin thu avanga mite rilru chawktho thei thute vawrhdarh a nih loh nante tanlak tha an ti a ni.


Sawrkar chuan thu dik belhchian dawl puangchhuak thin mahse, a changa Social Media lam Facebook leh Whatsapp ah te a thu thangva belhchian dawl tawklo leh mi rilru tina thei thu thehdarh a awmfo chu pawi an tih thu pawh meeting ah hian sawilan a ni a. Hemi kawngah hian Social Media hmangtute pawh fimkhur turin an ngen nghal a ni.


Tunhnaia New Delhi a DGP/IGP intawhkhawma an ngaih-mawh, India ram Police te film leh media hrang hranga rintlak tawklo ang thaw a tihlan fo thin chungchang chu, hei hi Mizoram bikah chuan a la thleng ve lo niin meeting chuan a ngai a ni.


Friday, July 3, 2015 - 11:51 - Zothlifim

Chief Minister Pu Lal Thanhawla chuan nimin khan Aizawlah Digital India Week leh e-Services a hawng a. e-Services a hawn takte hi CM Online,e-District State Roll Out Project, State Service Delivery Gateway/ State Portal Project, Inventory Management System, Excise and Narcotics Department Network leh Online Property Return Software te a ni.

Chief Minister chuan Digital India Week Prime Minister-in New Delhia nimina a hawn tak chu Mizoram pawhin a zui ve nghal a ni a ti a. Tunlai khawvel changkang zelina a ken tel, internet hmanga mobile te, web technology te, Facebook, Whatsapp, Twitter leh a dang tam takte hi nitin nunah a bet tawh a ni a ti a. Thalaiten abikin an hmang tangkai hle a ni tih sawiin, kum upa lam tawhte pawhin an duh emaw duhlo emaw an zir chhoh zel angai dawn a ni a ti. Tunah hian Online in tax te pek theih bakah application form lak nan leh submit nante hman mek a ni a ti.


Mizoram chu hmun kilkhawra awm anih avangin Information Technology hi hman tangkai tur a ni a ti a, internet chak tak hmu thei tura Optic Fibre Cable (OFC) leia phumte misualin ruk an chin avangin a tichaklo thei tih sawiin, hmasawnna tiṭhuan-awptu te lakah heng thil neih that te hi ven tlan a pawimawh hle a ni a ti a. Internet connection tichak turin power supply tha mamawh a ni a, World Bank atangin tanpuina beisei mek a ni a ti a. Sorkarin hmasawnna huapzo, inclusive growth a kalpui mek hi chak leh zual kalpui anihna turin mipuiten tan kan lak tlan a tul a ni a ti.


Chief Minister chuan Digital India Week hi a kamkeuna programme chauh a ni a, hapta 1 chhung lek nilo, kumtluana kalpui tur a ni a ti a. Hei hian thalaite tan hnathawh tur a siam ngei a beiseiawm a ni a ti a. A hlawhtlinna turin department hrang hrangte ah thui tak a innghat a ni a ti. Digital India Week hi Dist dangah pawh vawiin vek khan hawn a ni a, India khua leh tui dik tak ten sorkara hamthatna tam tak awmte electronics kaltlanga an hmuh theihna tur leh information and communication technology thar ber zel an tangkaipui theihna tur a ni.


Friday, July 3, 2015 - 11:47 - Zothlifim

Nimin zinga Women’s World Cup Semi-Final khelhah Japan chuan injury tima-a England Captain Laura Bassett goal hmanga hnehna changin Final an lut.

A vawikhatna atan hmeichhe World Cup a semi-final lut England hian inkhel ṭan tirh lamah goal thun theihna hun ṭha tak tak an nei a, mahse an chhawr tangkai theilo. Japan zawkin goal an thun hmasa ta a, penalty aṭangin minute 32-na ah Aya Miyama chuan goal a rawn thun a, minute 8 vel lek a ral tihin England Captain Bassett chuan penalty a hlawh chhuak ve a, heta ṭang hian Fara Williamws chuan an si phurh a rawn sût a, 1-1-in hun pangngai an hmang zo mai dawn emaw tih hnu-ah England tana Penalty hlawh chhuaktu, an captain Bassett a chesual a, minute 90 hnu-ah Japan lamin an lama through ball an vawrh luh chu lo dan tumin alo pêt a, mahse a pet out zo lova, an goal bar perin an goal-ah a tilut ta hlauh zawk a, hun a tawp zui a, Japan chu 2-1-in an chak zawk ta a ni.


England hian semi-Final an thlen bawi khatnaah hian an vanduai hle a, Japan ai hian goal chance an nei ṭha zawk a ni.


Japan hian kum 2011 final-a an lo hneh tawh United States chu final-ah an hmachhawn leh dawn a, khami ṭum khan Japan hian penalty hmangin a chak zawkah an ṭang a, England hian pathumna zawnnaah Germany an hmachhawn dawn a ni.


Friday, July 3, 2015 - 11:40 - Zothlifim

World No. 1 pahnih – Serena Williams leh Novak Djokovic te chuan harsa lo takin Third Round an lut.

Serena hian khawlum tak hnuaiah Timea Babos chu 6-4, 6-1-in a hneh a, Third Round-ah hian British chhuanvawr Heather Watson a hmachhawn dawn a ni.


Second Round-ah hian 2004 Champion, Maria Sharapova chuan Straight-set 6-3, 6-1-in Richel Hogenkamp a hneh a, a hmachhawn leh tur chu Irina-Camelia Begu a ni dawn a, Serena laizawn, Venus Williams pawhin 7-6 (7-5), 6-4-in Yulia Putintseva a hneh a, World No. 1 hlui Victoria Azarenka pawhin Third Round lut turin Kirsten Flipkens chu 6-3, 6-3-in a hneh a, Kristina Mladenovic a hmachhawn leh dawn a ni.


Hetihlai hian World No. 1 hlui Ana Ivanovic erawhin Second Round a paltlang zo lova, American qualifier, World No. 158 Bethanie Mattek-Sands lakah 6-3, 6-4-in a tlawm thung a ni.


Second Round paltlang zingah 6-Lucie Safarova, 14-Andrea Petkovic leh 22-Samantha Stosur te pawh an tel a, player langsar zinga Second round paltlang zo lo zingah 19-Sara Errani, Daniela Hantuchova leh 11-Karolina Pliskov te an tel thung.

Mipa champion lai, Novak Djokovic chuan 41.2°C hnuaia a inkhelhpui, Jarkko Nieminen chu 6-4, 6-2, 6-3-a hnehin third-round-ah 27th seed Bernard Tomic a hmachhawn dawn a ni.


French Open Champion Stan Wawrinka pawhin awlsam takin Victor Estrella Burgos chu 6-4, 6-4, 7-5-in a paltlang a, Second round paltlang zingah hian 9-Marin Cilic, 14-Kevin Anderson, 24-Leonardo Mayer, 7-Milos Raonic, 26-Nick Kyrgios, 17-John Isner, 11-Grigor Dimitrov, 16-David Goffin leh 21-Richard Gasquet te an tel a.


Hetihlai hian 5th Seed 5-Kei Nishikori chu a châwn tha hliam vangin he tournament aṭang hian a inhnukdawk a, Tommy Haas leh Juan Monaco pawhin Third Round an thleng zo lo bawk a ni.


Friday, July 3, 2015 - 11:38 - Zothlifim

##    Manchester United chuan January thla aṭang khan a rukin an striker, kum 31-a upa, Robin van Persie chu an zuar tawh tih a team-mate hlui, Pierre van Hooijdonk chuan a sawi.             -Daily Mirror

##    Van Persie hian Old Trafford a chhuahsan a nih chuan Besiktas chuan Netherlands Striker hi Turkey lamah an hruai an inbeisei.                      -Sun


##    Hetihlai hian Manchester United chuan Fernerbahce-in £3.5m-a an winger Nani lei an dilna chu an hnawlsak a, season liamtaa Sporting Lisbon-a khel, Nani hi £6m an chhiar a ni.                 -Daily Star


##    Monaco forward Radamel Falcao, 29 chuan Chelsea-a lut turin thil tihfel ngai te a tifel zo thawhkhat tawh a, a club tharin North America-a pre-season tour an neih a zawm ang.                 -Guardian


##    Chelsea chuan Stoke City goalkeeper, Asmir Begovic lei an ngamna zat chu £8m-a tihsan leh an tum.             -Daily Telegraph


##    Manchester City-in Juventus midfielder, Paul Pogba lakluh an tumnaa midang an elpuina kawnga harsatna an tawh tizual turin Barcelona chuan Pogba manah hian £56.7 ngawt theh chhuah an phal ta tlat mai. Hetihlai hian City chuan Wolfsburg forward Kevin de Bruyne lakluh an hnaih tawh hle niin an inhria.             -Daily Mail


##    Manchester United-in fee leh hlawha £120m lawih tling thei tura tawktarh an siamsak nia sawi a nih hnuah Tomas Muller, 25 chuan Bayern Munich-ah ngaihngam taka a la awm thu a sawi.           -Daily Express


##    Liverpool chuan Aston Villa Stiker Christian Benteke chu an lalut fel thei ṭep.                         -Talksport


##    Midfielder Abou Diaby, 29 chu Arsenal-in an chhuah zalen hnuah MLS Club, FC Dallas nen inbiakna an nei mek.                         -Daily Mirror


##    Sunderland chuan Newcastle ai chuan Chelsea midfielder, Marco van Ginkel chu loan-a an lakluh theih zawk an beisei.                     -Voetbal International


Pages